الماتى قالاسىنىڭ اكىمدىگى مەملەكەت باسشىسىنىڭ تاپسىرمالارىن بەلسەندى ىسكە اسىرۋدا. قالا ەكونوميكاسىنىڭ تۇراقتى ءوسۋى قامتاماسىز ەتىلدى. قىسقا مەرزىمدى ەكونوميكالىق ينديكاتور 107،6%-كە دەيىن ءوستى. بۇل تۋرالى الماتى اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە مالىمدەدى.

«وسى جىلدىڭ باسىنان بەرى 16،3 مىڭ جۇمىس ورنى قۇرىلدى. 3،3 مىڭ ورىندىق 54 بالا باقشا اشىلدى، 45 كم ينجەنەرلىك جەلى سالىندى. گازبەن جۇرەتىن 300 اۆتوبۋس ساتىپ الىندى، 145 مىڭ اعاش وتىرعىزىلدى. بيىل قىركۇيەك ايىنا دەيىن الماتى اگلومەراسياسىن دامىتۋدىڭ كەشەندى جوسپارى ازىرلەنەدى. بۇل جوسپاردا مەگاپوليس پەن الماتى وبلىسى سينەرگياسىنىڭ جوبالارى ايقىندالاتىن بولادى»،- دەدى اكىم.

ونىڭ ايتۋىنشا، وڭدەۋ ونەركاسىبى، قۇرىلىس، كولىك، بايلانىس قىزمەتتەرى ەكونوميكانىڭ ءوسۋ درايۆەرلەرىنە اينالدى. جوعارى ينۆەستيسيالىق بەلسەندىلىك بايقالادى. جىل باسىنان بەرى نەگىزگى كاپيتالعا سالىناتىن ينۆەستيسيالار 21%-عا ءوستى. 

قالا ەكونوميكاسىنىڭ نەگىزگى سالاسى – ساۋدا جىل باسىنان بەرى العاش رەت 1،7%-عا ارتىپ، «وڭ ايماققا» شىقتى.

وسى جىلدىڭ 5 ايىندا الماتىداعى ىسكەرلىك بەلسەندىلىك يندەكسى 4 پروسەنتتىك تارماققا ءوسىپ، مامىر ايىنىڭ سوڭىندا 48،7%-دى قۇرادى. ءبىرىنشى جارتى جىلدىقتىڭ قورىتىندىسى بويىنشا 50%-دان استام دەڭگەيمەن وڭ ايماققا شىعۋ كۇتىلەدى.