گرانتتار نەگىزىنەن مەديسينا، ءبىلىم، قۇرىلىس، اۋىل شارۋاشىلىعى جانە كولىك قىزمەتتەرى سالالارىنداعى مامانداردى دايارلاۋعا بولىنەدى. بۇل تۋرالى شقو اكىمى دانيال احمەتوۆ ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتى بارىسىندا حابارلادى.

– «بىلىكتى مامان» باعدارلاماسى 2017 جىلدان باستاپ جۇزەگە اسىرىلۋدا جانە ونىڭ نەگىزگى ماقساتى – وڭىردەگى مەكتەپتەر مەن كوللەدجدەر تۇلەكتەرىنىڭ شەتەلدىك جوعارى وقۋ ورىندارىنا كەتۋىن تومەندەتۋ جانە وبلىس كاسىپورىندارىن جوعارى بىلىكتى كادرلارمەن قامتاماسىز ەتۋ. وسى سەبەپتى، ءبىز اعىمداعى جىلى مىندەتتى تۇردە گرانتتار ءبولۋدى جالعاستىرامىز، ونىڭ ۇستىنە ولاردىڭ سانى 410-نان 450-گە دەيىن ۇلعايتىلدى، – دەدى دانيال احمەتوۆ.

وبلىس اكىمىنىڭ ايتۋىنشا، گرانتتار دارىگەرلەردى، پەداگوگتەردى، ساۋلەتشىلەردى، قۇرىلىسشىلاردى، ۆەتەرينارلاردى، سپورتشىلاردى، سونداي-اق تەلەكوممۋنيكاسيا، ينجەنەريا، ءوندىرىس جانە وڭدەۋ، تاۋ-كەن ءىسى، ستاندارتتاۋ، سەرتيفيكاتتاۋ، مەترولوگيا جانە كولىك قىزمەتتەرى سالاسىنداعى مامانداردى دايارلاۋعا بولىنەتىن كورىنەدى.