الماتىدا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تەجەۋ ءۇشىن الدىن الۋ شارالارى قابىلدانىپ جاتىر. بۇل تۋرالى قالا اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە مالىمدەدى.

ونىڭ ايتۋىنشا، «اينالىم سحەماسى» بويىنشا قارجىلاندىرۋ 4 ملرد تەڭگەگە، 11 ملرد تەڭگەدەن 15 ملرد تەڭگەگە دەيىن ۇلعايتىلدى. بەلگىلەنگەن باعامەن ساتۋ ءۇشىن 6،5 مىڭ توننا قانت ساتىپ الىندى. سونداي-اق تۇركىستان جانە الماتى وبلىستارىنان، تاياۋ جانە قيىر  شەتەلدەردەن كوكونىس پەن جەمىس تىكەلەي جەتكىزۋ ۇيىمداستىرىلدى.

«نان باعاسىن تۇراقتاندىرۋ ءۇشىن ازىق-تۇلىك كورپوراسياسىمەن جىل سوڭىنا دەيىن كەلىسىمشارت جاسالدى. قانت باعاسىنىڭ ءوسۋ ىقتيمالدىلىعى، باكالەيا ونىمدەرى قورلارىنىڭ ازايۋ، رەسەيگە كوكونىس ونىمدەرىن جاپپاي ەكسپورتتاۋ تاۋەكەلدەرىنە بايلانىستى ءىرى ساۋدا جەلىلەرىنە قانت اكەلۋگە جەكەلەگەن كۆوتالار ءبولۋ ماسەلەسى پىسىقتالىپ جاتىر»، - دەدى اكىم.