ەمحانالارعا تۇسەتىن جۇكتەمەنى ازايتۋ جانە كونسۋلتاسيالىق-دياگنوستيكالىق قىزمەتتەردىڭ قولجەتىمدىلىگىن ارتتىرۋ ءۇشىن جىل سوڭىنا دەيىن كەمەل جانە مامىر شاعىن اۋداندارىندا 2 وتباسىلىق-دارىگەرلىك امبۋلاتوريانى سالۋ جانە №11 قالالىق ەمحانانى كۇردەلى جوندەۋ جۇمىستارى اياقتالادى. سونداي-اق سايالى، قاراسۋ جانە نۇرشاشقان شاعىن اۋداندارىندا 3 وتباسىلىق-دارىگەرلىك امبۋلاتوريانىڭ قۇرىلىسى باستالىپ، 2023 جىلى اياقتالادى. بۇل تۋرالى الماتى اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە مالىمدەدى.

«ەمحانالاردى زاماناۋي مەديسينالىق جابدىقتارمەن تولىق قامتاماسىز ەتۋگە 1،7 ملرد تەڭگە ءبولىندى. بۇدان باسقا، جىلدىڭ سوڭىنا دەيىن 2 ەمحانا مەن 3 وتباسىلىق-دارىگەرلىك امبۋلاتوريا، 2023 جىلى تاعى 3 وتباسىلىق-دارىگەرلىك امبۋلاتوريا سالۋ ءۇشىن جوبالاۋ-سمەتالىق قۇجاتتامانى ازىرلەۋ جۇمىستارى اياقتالادى. انا مەن بالا ءولىمىن ازايتۋ ءۇشىن بيىل بالالارعا شۇعىل كومەك كورسەتۋ ورتالىعىنىڭ جاڭا كورپۋسى سالىنىپ بىتەدى، 4 پەرزەنتحانا مەن 2 بالالار ستاسيونارىن 2،8 ملرد تەڭگەگە تەحنيكالىق جاراقتاندىرۋ جاقسارتىلادى. قان اينالىمى جۇيەسى اۋرۋلارىنان، ونكوپاتولوگيالاردان بولاتىن ءولىم جاعدايىن ازايتۋ ءۇشىن ءۇش جىلدىق باعدارلاما شەڭبەرىندە 6،9 ملرد تەڭگە سوماسىنا كوپ بەيىندى ستاسيونارلار جاڭعىرتىلادى»، - دەدى سپيكەر.

سونداي-اق، اسا تاپشى ماماندىقتار بويىنشا 240 دارىگەردى دايارلاۋ جانە 1000 مەدبيكەنى وقىتۋ جۇرگىزىلۋدە. 2022 جىلى مەديسينالىق-سانيتارلىق العاشقى كومەكتى دامىتۋ مەديسينالىق قىزمەتتەردىڭ قول جەتىمدىلىگى مەن ساپاسىن ارتتىرادى، انا ءولىمىن 3 ەسە ازايتادى.