اتىراۋ وبلىسىنىڭ بۇرىنعى اكىمى بەرگەي رىسقالييەۆ ەكس-پرەزيدەنت نۇرسۇلتان نازاربايەۆتى بوپسالاعانىن تەرىسكە شىعاردى. بۇل تۋرالى ول Orda.kz باسىلىمىنا بەرگەن سۇحباتىندا ايتتى.
– بۇل "بارلىعىن بىلگىش" بولىپ كورىنگىسى كەلەتىن باپيدىڭ (ەرمۇرات باپي – رەد.) ويدان شىعارعانى. ءيا، جىگىتتەر ولاردى (نازاربايەۆ پەن اينالاسىنداعىلاردى – رەد) سەرۋەندەپ جۇرگەندە كورىپ، ۆيدەوعا ءتۇسىرىپ العان. سودان كەيىن ولار توقتاعان ءۇيدىڭ الدىندا شاعىن ميتينگ وتكىزىپ، تاراپ كەتتى. بۇل باپي ايتىپ وتىرعانداي ۇلكەن قورشالعان كوتتەدج ەمەس، جوعارى دەڭگەيدەگى تۇرعىن ءۇي بولاتىن. ەگەر بوپسالاۋ بولسا، سول كەزدە مەنىڭ "قىلمىستىق ءىسىم" قارالىپ، بارلىق مۇلىكتەرىم مىندەتتى تۇردە قايتارىلاتىن ەدى. وزدەرىڭىز بىلەتىندەي، نازاربايەۆ 2019 جىلى مۇنى ىستەي الاتىن جاعدايدا بولدى، – دەيدى بەرگەي رىسقالييەۆ.
ۇلىبريتانيادا تۇرىپ جاتىر ەكس-اكىم قازاقستانعا قايتا ورالۋ جونىندە دە پىكىر ءبىلدىردى.
– بۇل – مەنىڭ قولىمدا تۇرعان دۇنيە ەمەس. مەنىڭ ءىسىم ساياسي بەيتاراپ دەڭگەيدە قارالۋى كەرەك. سوت جاڭا قاۋلىلارىندا مەنىڭ جانە باسقا سوتتالعانداردىڭ مەملەكەتكە ءبىر دە ءبىر شىعىن كەلمەگەنى انىق كورسەتىلگەن. مەن بۇل تۋرالى 2022 جىلعى 20 ماۋسىمدا جوعارعى سوتقا كاسساسيالىق تارتىپتە قايتا قاراۋ تۋرالى ەكى وتىنىشتە جازدىم. جاۋابىن كۇتىپ ءجۇرمىن، – دەيدى رىسقالييەۆ.
2019 جىلعى قىركۇيەكتە الەۋمەتتىك جەلىدە نۇرسۇلتان نازاربايەۆ لوندونداعى گايد-پاركتە سەرۋەندەپ جۇرگەن ۆيدەو تاراپ، ونى بەرگەي رىسقالييەۆ تۇسىرگەنى تۋرالى اقپارات شىققان. بۇدان بولەك، جۋرناليست ەرمۇرات باپي ەكس-اكىم نازاربايەۆتى بوپسالاعان ۆيدەو بار ەكەنىن، ونى كوزىمەن كورگەنىن ءمالىم ەتكەن.
2020 جىلعى 16 ماۋسىمدا جوعارعى سوت باس پروكۋراتۋرانىڭ نارازىلىعى بويىنشا اتىراۋ وبلىسى ەكس-اكىمىنىڭ پايداسىنا شەشىم شىعارىپ، رىسقالييەۆكە مەملەكەت تاركىلەگەن مۇلىكتىڭ ءبىر بولىگى قايتارىلعان. ولاردىڭ قاتارىندا اتىراۋ وبلىسىندا عانا ەمەس، الماتى مەن اقتوبەدە دە ورنالاسقان ءارتۇرلى كومپانيالاردىڭ جەرى، قاراجاتى، جارعىلىق كاپيتالىنداعى ۇلەستەرى بار. سونداي-اق قۇزىرلى ورگان اعايىندى رىسقالييەۆتەردىڭ ايەلدەرىنىڭ مۇلكىن تاركىلەۋ تۋرالى قاۋلى كۇشىن جويدى.
وسىدان كەيىن ەل ىشىندە رىسقالييەۆ "نازاربايەۆتى بوپسالاۋ" ارقىلى مۇلكىنىڭ ءبىر بولىگىنىڭ قايتارىلۋىنا قول جەتكىزدى دەگەن اڭگىمەلەر تاراعان.
پىكىر قالدىرۋ