قاڭتار وقيعاسى بويىنشا 83 ادام باس بوستاندىعىنان ايىرىلدى. بۇل تۋرالى باس پروكۋراتۋرا ءبىرىنشى قىزمەت باسشىسىنىڭ ورىنباسارى ەلدوس قيلىمجانوۆ مالىمدەدى.

ونىڭ ايتۋىنشا، ارنايى پروكۋرورلار جاپپاي تارتىپسىزدىك بويىنشا 53، تەرروريزم اكتىسى بويىنشا 32 قىلمىستىق ءىستى قاراپ جاتىر. ەلدىڭ 8 ايماعىندا 30 مىڭنان استام تەرگەۋ جۇمىستارى جۇرگىزىلىپ، 3 مىڭنان استام سوت مەديسينالىق ساراپتاماسى جاسالعان. 

– ءقازىر 349 كۇدىكتى قاماۋدا جاتىر. قاڭتار وقيعاسى بويىنشا جاۋاپكەرشىلىككە تارتىلعان 545 ادامنىڭ 429-ىنىڭ ءىسى قىلمىستىق ءىس بويىنشا سوتقا جولداندى، – دەيدى ەلدوس قيلىمجانوۆ.

قيلىمجانوۆ تۇرمە مەرزىمىن ارقالاعاندار عيماراتتاردى قيراتۋعا، ورتەۋگە، قارۋ-جاراق ۇرلاۋ، مەملەكەتتىك مەكەمەلەر مەن پوليسيا قىزمەتكەرلەرىنە شابۋىل جاساۋعا قاتىسقاندار ەكەنىنە سەنىمدى. ول مۇنىڭ ءبارى جەتكىلىكتى تۇردە تەكسەرىلگەنىن ايتادى.