قارجىلىق مونيتورينگ اگەنتتىگى رەيدەرلىك تاركىلەۋمەن اينالىسقان ءبىر توپ ادامنىڭ ارەكەتىن توقتاتقانىن حابارلادى.
اگەنتتىك مالىمەتىنشە، 2022 جىلعى 14 شىلدەدە بىرنەشە ادام قىلمىستىق كودەكستىڭ 128-بابىنا سايكەس قىلمىستىق ىس-ارەكەت ەپيزودتارىنىڭ ءبىرى بويىنشا ۇستالىپ، ۋاقىتشا ۇستاۋ يزولياتورىنا قامالعان. ولار:
- تاناشيەۆ تيمۋر سەرجان ۇلى، 1983 جىلى تۋعان؛
- بابايەۆ راۋان تيمۋر ۇلى، 1992 جىلى تۋعان؛
- التىباساروۆ اڭسار مۇرات ۇلى، 1990 جىلى تۋعان؛
- ابيجانوۆ داستان ءمادي ۇلى، 1977 جىلى تۋعان.
15 شىلدەدە الماتى قالاسى مامانداندىرىلعان تەرگەۋ سوتى اتالعان ازاماتتاردى 2 اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكسيالاعان.
"سونىمەن بىرگە، سوت قوسپايەۆ ەلدوس ايدىنعاليۇلىنا ىزدەۋ جاريالاپ، قاماۋعا الۋ تۋرالى بۇلتارتپاۋ شاراسىن تاڭدادى. قوسپايەۆ ايدوس ايدىنعالي ۇلى مەن شالين رۋسلان ەۆگەنييەۆيچ كۇدىكتى دەپ تانىلدى. قۇرمەتتى ازاماتتار! ەگەر ءسىز اتالعان تۇلعالاردىڭ زاڭسىز ارەكەتتەرىنەن زارداپ شەككەن بولساڭىز، قارجىلىق مونيتورينگ اگەنتتىگىنىڭ سەنىم تەلەفوندارىنا نەمەسە اۋماقتىق ەكونوميكالىق تەرگەۋ باسقارمالارىنا حابارلاسۋىڭىزدى سۇرايمىز." دەيدى اگەنتتىكتەگىلەر.
Orda.kz باسىلىمى ەلدوس قوسپايەۆ ەكس-پرەزيدەنت نۇرسۇلتان نازاربايەۆتىڭ ءىنىسى بولات نازاربايەۆتىڭ وڭ قولى ەكەنىن، ءساۋىر ايىندا ەلدەن كەتكەننەن ءالى كەلمەگەنىن جازادى. باسىلىم دەرەگىنشە، قوسپايەۆ اتالعان ىستەگى باستى كۇدىكتى بولۋى مۇمكىن.
پىكىر قالدىرۋ