قازاقستاندا جوسپارلانىپ وتىرعان مەكتەپتەگى وقۋ جىلىن ۇزارتۋ وقۋشىلاردىڭ جازعى دەمالىسىنا اسەر ەتپەيدى، بالالار 1 ماۋسىم مەن 1 قىركۇيەك ارالىعىندا دەمالادى. بۇل تۋرالى وقۋ-اعارتۋ ءمينيسترى اسحات ايماعامبەتوۆ ءمالىم ەتتى.
ءمينيستردىڭ ايتۋىنشا، وقۋ جىلىن ۇزارتۋدى جاقتايتىن ساراپشىلار ءتورتىنشى توقساندى 20-25 ماۋسىمعا دەيىن سوزىپ، وقۋ جىلىن 20 تامىزدان باستاۋدى ۇسىنعان. الايدا مينيسترلىك قۇرعان پسيحولوگ، اتا-انالار مەن پەداگوگتاردان تۇراتىن جۇمىس توبى حالىقارالىق تاجىريبەنى زەردەلەي وتىرىپ ۇسىنىستى ماقۇلداماي، بالاما ۇسىنىس ەنگىزگەن. ول بويىنشا وقۋ جىلى ادەتتەگىدەي 1 قىركۇيەكتە باستالىپ، 31 مامىردا اياقتالادى. 1 ماۋسىمنان بالالار كانيكۋلعا شىعادى.
"وسىلايشا، كانيكۋلعا شىعۋ ايىرماشىلىعى 5 كۇندى عانا قۇراپ، بالالار جاز بويى دەمالا الادى. وسى رەتتە ءبىز ساپانى وقۋ كۇندەرىن كوبەيتۋ ەسەبىنەن عانا ەمەس، وقۋ جۇكتەمەسىن ازايتىپ، وقۋ باعدارلاماسىن جەتىلدىرۋ، مامانداردىڭ بىلىكتىلىگىن ارتتىرۋ ارقىلى دا جاقسارتاتىن بولامىز. جاڭا وقۋ جىلىنان باستاپ مەكتەپتەردەگى وقۋ جۇكتەمەسىن ازايتۋ جوسپارلانىپ وتىر. ال وقۋ جىلىن ۇزارتۋ – ساباق ازاياتىندىقتان وقۋشىلارعا قوسىمشا ءبىلىم الۋعا كوبىرەك ۋاقىت ارناۋىنا مۇمكىندىك بەرەدى" دەدى ايماعامبەتوۆ ءوزىنىڭ بلوگىنا كەلىپ تۇسكەن وتىنىشكە بەرگەن جاۋابىندا.
بۇعان دەيىن ەلدەگى وقۋ جىلىن ەكى اپتاعا ۇزارتۋ جوسپارلانىپ وتىرعانى حابارلانعان. مينيسترلىك وقۋ جىلىنىڭ ۇزاقتىعىن 1-سىنىپتار ءۇشىن 35، (ءقازىر 33 اپتا)، 2-11 (12)-سىنىپتار ءۇشىن 36 وقۋ اپتاسىنان (ءقازىر 34 اپتا) تۇراتىنداي ەتىپ ۇزارتۋدى كوزدەپ وتىر.
پىكىر قالدىرۋ