«AMANAT» پارتياسى جانىنداعى «جەر اماناتى» كوميسسياسى جەتىسۋ وبلىسىندا بولدى. كوشپەلى كەڭەس قورىتىندىسى بويىنشا، وڭىردە 41 مىڭ گەكتاردان استام جايىلىمدىق جەر مەملەكەت مەنشىگىنە قايتارىلدى، دەپ حابارلادى پارتيانىڭ باسپا ءسوز قىزمەتى.

كوميسسيا مۇشەلەرى – پارتيا حاتشىسى داۋلەت كارىبەك، زاڭگەر باقىتجان بازاربەك، «AMANAT» پارتياسىنىڭ اتىنان سايلانعان ءماجىلىس دەپۋتاتى جاناربەك ءاشىمجان، اشم جەر رەسۋرستارىن باسقارۋ كوميتەتىنىڭ ءتوراعاسى مۇرات تەمىرجانوۆ كەربۇلاق، ەسكەلدى جانە كوكسۋ اۋداندارىنىڭ تۇرعىندارىمەن كەزدەسىپ، جەر قاتىناستارى سالاسىنداعى وزەكتى ماسەلەلەردى تالقىلادى.

پارتيا حاتشىسى داۋلەت كارىبەك اتالعان جۇمىس ەلىمىزدىڭ بارلىق وڭىرىندە جۇرگىزىلىپ جاتقانىن اتاپ ءوتتى.

«مەملەكەت باسشىسى قاسىم-جومارت توقايەۆ يگەرىلمەي جاتقان جايىلىمدىق جەرلەردى مەملەكەت مەنشىگىنە قايتارۋ تۋرالى ناقتى تاپسىرما بەردى. پرەزيدەنت ايتىپ وتكەن الەۋمەتتىك ادىلەتتىلىكتى قامتاماسىز ەتۋ ماسەلەسى «AMANAT» پارتياسىنىڭ نەگىزگى باسىمدىقتارىنىڭ ءبىرى سانالادى. ءاربىر اۋىل تۇرعىنىنىڭ پىكىرىن ەسكەرۋگە تىرىسامىز جانە جايىلىمدىق جەرلەر ءادىل ءبولىنۋى ءۇشىن بارىمىزدى سالامىز»، – دەپ اتاپ ءوتتى داۋلەت كارىبەك.

ءوز كەزەگىندە، لابازى اۋىلىنىڭ تۇرعىنى قيزات ابيروۆ بۇگىندە جايىلىمدىق جەرلەردىڭ تاپشىلىعى بۇرىنعىدان دا كوپ سەزىلىپ وتىرعانىن ايتتى.

«اۋىلدا تۇرىپ، مال باعىپ وتىرعاندار ءۇشىن بۇل ءبىرىنشى كەزەكتەگى ماسەلە. كوكسۋ اۋدانىندا 6 مىڭ گەكتاردان استام جەر قايتارىلدى. سوندىقتان وسى كوميسسيانىڭ جۇمىسىنا ۇلكەن ءۇمىت ارتامىز»، – دەپ تولىقتىردى قيزات ابيروۆ.

ەستەرىڭىزگە سالا كەتەيىك، پارتيا جانىنان «جەر اماناتى» كوميسسياسى قۇرىلعان بولاتىن. سوڭعى بىرنەشە ايدا كوميسسيانىڭ كۇشىمەن قاراعاندى، جامبىل، تۇركىستان جانە اقتوبە وبلىستارىنداعى 160 مىڭ گەكتاردان استام جايىلىمدىق جەر مەملەكەت مەنشىگىنە قايتارىلدى.