كازتاگ اقپارات اگەنتتىگىنىڭ باس ديرەكتورى، جۋرناليست اسەت ماتايەۆ اكەسى سەيتقازى ماتايەۆ ەكەۋىنىڭ تولىق اقتالعانى جونىندەگى جوعارعى سوت قاۋلىسىن العانىن ءمالىم ەتتى.
اسەت ماتايەۆ 19 شىلدە كۇنگى سوتتان وڭ شەشىم كۇتپەگەنىن، بۇعان دەيىنگى سوت وتىرىسىنداعى وزدەرىنە قارسى شەشىمدەر ولاردىڭ ءۇمىتىن سوندىرگەنىن ايتادى. ول ادىلەتتىڭ سالتانات قۇرۋ جولىندا قاراپ قالماعان قورعاۋشىلارى مەن جاقتاستارىنا العىس ءبىلدىردى.
"ءبىزدىڭ قورعاۋشىلارىمىز ءالىمجان ورالباي مەن دجوحار ۋتەبەكوۆكە العىسىمىز شەكسىز. ولار ءبىزدىڭ ءىس بويىنشا 2019 جىلدان بەرى باس پروكۋراتۋرانىڭ جانە جوعارى سوتتىڭ قارسىلىعىنا دەيىن جۇمىس جاسادى. 2016 جىلدىڭ قاڭتارىنان 2017 جىلعا دەيىن بىزبەن بىرگە بولعان، قارجى پوليسياسىنا، پروكۋراتۋراعا جانە سوتتارعا قارسى بارلىق كۇرەستەن وتكەن اندرەي پەتروۆ پەن مادينا باكييەۆاعا العىس بىلدىرەمىز. مەنى بوساتۋ ءۇشىن سوتتاردىڭ تابالدىرىعىن توزدىرعان قورعاۋشىم ساۋلە جۇبانيازوۆاعا العىس بىلدىرەمىن. بارلىق جۋرناليستەرگە، ەلىمىزدىڭ الاڭداۋشىلىق تانىتقان بارلىق ازاماتىنا، تۋىستارعا، دوستارعا، بارلىعىنا ءبىزدىڭ العىسىمىز زور. حالىقارالىق ۇيىمدار مەن جۋرناليستىك ۇيىمدارىنا دا. ءىستى وبەكتيۆتى قاراعان باس پروكۋراتۋراعا، ءىستىڭ نۇكتەسىن قويعان جوعارى سوت سۋديالارىنا دا العىس ايتامىز. ارينە، 6 جىل ءوتتى، بۇل از ۋاقىت ەمەس. دەسەك تە ادىلدىك جەڭدى!" دەگەن ول 2019 جىلدان بەرى اقتاپ الۋ بويىنشا ەكى رەت قادام جاسالعانىن، ۇشىنشىسىندە ادىلدىككە قول جەتكىزگەنىن اتاپ ءوتتى.
اسەت ماتايەۆ قاڭتار وقيعاسىنان كەيىن ەل وزگەردى دەپ سانايتىنىن، مەملەكەتتىڭ، پروكۋراتۋرانىڭ، قۇقىققورعاۋ ورگاندارىنىڭ جانە سوتتاردىڭ قالاۋى مەن جۇمىسىنا كوپ نارسە تاۋەلدى ەكەنىن ايتادى.
"ەلىمىزدە لايىقتى ادامداردىڭ بارىن بىرنەشە رەت ايتقانمىن. قازاقستاندا وڭ وزگەرىسكە دەگەن ساياسي ەرىك بار دەپ ويلايمىن، ودان باسقا جول جوق. ءبىز قازاقستانداعى ادىلدىككە ءوز ۇلەسىمىزدى قوسىپ كەلەمىز جانە قوسا بەرەتىن بولامىز. بارلىعىڭىزعا زور دەنساۋلىق، جارقىن كوڭىل-كۇي تىلەيمىن! وز-وزدەرىڭىزدى دامىتا بەرىڭىزدەر! بارلىقتارىڭىزعا ءقوپ راقمەت!" دەيدى ول.
جوعارى سوت 19 شىلدە كۇنى استانا قالاسى سوتىنىڭ 2016 جىلعى 9 جەلتوقسانداعى سەيتقازى جانە اسەت ماتايەۆتارعا قاتىستى ۇكىمىنىڭ كۇشىن جويعان.
ماتايەۆتار 2016 جىلى سوتتالعان. قىلمىستىق ءىس كازتاگ اقپارات اگەنتتىگىن تارتىپ الۋ ماقساتىمەن ۇيىمداستىرىلعان. ولاردىڭ ءىسىن قازاقستاندىق جانە شەتەلدىك قۇقىققورعاۋشىلار ساياسي استارى بار دەپ تانىعان. ايىپتاۋدىڭ ءبىر تارماعى دا دالەلدەنبەگەنىنە قاراماستان، سوت ايىپتاۋ ۇكىمىن شىعارعان. ماتايەۆتاردى تاپسىرىسپەن قۋدالاۋعا قاتىسۋشىلاردىڭ بىردە-بىرى ءالى كۇنگە دەيىن جازاعا تارتىلمادى. اقتالعاننان كەيىن بۇل وتباسىعا تيەسىلى تاركىلەنگەن دۇنيە-مۇلىكتەر تۇگەل قايتارىلادى.
پىكىر قالدىرۋ