بۇگىن ءبىر توپ قوعام بەلسەندىلەرى سايلاۋ تۋرالى زاڭعا ەنگىزۋ كوزدەلىپ وتىرعان وزگەرىستەر جوباسىنا نارازىلىق ءبىلدىرىپ باسپا ءسوز كونفەرەنسياسىن وتكىزدى. سايلاۋدى ورتالىق سايلاۋ كوميسسياسىنىڭ  اككرەديتاسياسىنان وتكەن، سوڭعى ءبىر جىلدا شەتەلدەن قارجى الماعان ۇيىمدارعا عانا باقىلاۋعا مۇمكىندىك بەرەتىن جوبانى قوعامدىق تالقىلاۋ بۇگىن اياقتالادى. قوعام بەلسەندىلەرى پرەزيدەنت قاسىم-جومارت توقايەۆتى زاڭ جوباسىنا قول قويماۋعا شاقىردى. 

– نازاربايەۆ پەن ونىڭ جولداستارى 30 جىل بويى حالىقتىڭ داۋىسىن ۇرلادى. ءبىر رەت تە ءادىل سايلاۋ بولعان جوق. سوڭعى رەت قاشان ءادىل سايلاۋ ءوتىپ ەدى؟ توقايەۆ پرەزيدەنت اتانعانىنا 3 جىل بولدى. الايدا بۇگىنگە دەيىن دەموكراتيالىق بەتبۇرىس بولعان جوق. ەندىگى زاڭ قابىلداناتىن بولسا، جاعداي تىپتەن ناشارلايدى. مىنا قاڭتار وقيعاسىنان كەيىن بيلىك دۇرىستاپ ويلانۋى كەرەك. ايتپەسە تاعى دا قاڭتار وقيعاسى قايتالانسا بيلىكتىڭ تۇگى قالمايدى. بيلىك ۇسىنىستارىمىزدى ەسكەرمەيتىن بولسا، حالىققا ۇندەۋ جاسايتىن بولامىز. داۋىستى ۇرلاپ، حالىقتى الداۋدى توقتاتۋ كەرەك، – دەيدى جيىنعا قاتىسقان ساياساتكەر بالتاش تۇرسىمبايەۆ. 

"تاۋەلسىز باقىلاۋشىلار" بىرلەستىگىنىڭ جەتەكشىسى ارايلىم نازار تاۋەلسىز باقىلاۋشىلاردى اككرەديتاسيادان وتكىزبەيتىن بولسا، سايلاۋ ءادىل وتپەيتىنىن ايتادى. 

– اككرەديتاسيا الۋ قانشالىقتى قاجەت؟ باقىلاۋشىلاردى اككرەديتاسيادان وتكىزۋ دەگەنىمىز سايلاۋ ءادىل وتپەيتىنىن بىلدىرەدى. ادىلەت مينيسترلىگىنىڭ زاڭ جوباسىندا بىرنەشە ادىلەتسىزدىكتەر بار. مىسالى، وسى زاڭ جوباسى ارقىلى تاۋەلسىز باقىلاۋشىلارعا سايلاۋ كەزىندە تۇسىرگەن فوتو، ۆيدەونى جاريالاۋعا كەدەرگى جاساماقشى. بۇدان بولەك، باقىلاۋشىلار جالاقىسى، بانك شوتتارىنا قاتىستى اقپارات بەرۋى كەرەك ەكەن. الايدا وسك بيۋدجەتتەن سايلاۋعا بولىنگەن اقشانى قالاي جۇمساعانىن مەملەكەتتىك ساتىپ الۋ پورتالىنان كورە المايمىز. بۇل – ادىلەتسىزدىك. زاڭ بارىنە ورتاق بولۋى ءتيىس، – دەدى ارايلىم نازار. 

ال ساياساتكەر رىسبەك سارسەنباي ۇلى زاڭ جوباسىن بيلىكتىڭ ىڭعايىنا قاراي جاسالعان دەپ سىنادى. ونىڭ ايتۋىنشا، بۇل – توقايەۆتىڭ الداعى سايلاۋعا جاساعان دايىندىعى. 

– بۇل زاڭ جوباسى مۇلدەم تالقىلانباۋى كەرەك. تالقىلاۋدان الىنىپ تاستالۋى ءتيىس. ەگەر بۇل زاڭ جوباسى قابىلدانسا، توقايەۆتىڭ ەكىجۇزدىلىك تانىتىپ وتىرعانىن بىلدىرەدى. ول وسى ماسەلەنىڭ ءمان-جايىن ءتۇسىندىرىپ، بۇل زاڭ جوباسىن قابىلداۋ دەموكراتياعا قارسى كەلەتىنىن اشىق تۇردە ايتۋى كەرەك. ايتپەسە، توقايەۆ الداعى سايلاۋعا قام جاساپ وتىرعانى. ءادىل سايلاۋ وتكىزەتىن بولسا، سۇرىنەتىنىن بىلگەندىكتەن وسىنداي ارەكەتكە بارۋدا، – دەيدى رىسبەك سارسەنباي ۇلى. 

ازاماتتىق بەلسەندى، زاڭگەر ءالنۇر يلياشيەۆ بيلىكتى ديالوگ ورناتۋعا شاقىرسا، ەرمۇرات باپي زاڭ جوباسى پارلامەنتكە جىبەرىلسە، قارسىلىق اكسياسىن وتكىزۋ كەرەگىن ايتتى.