الماتىدا ۇلتتىق ۇلاننىڭ 5571 اسكەري ءبولىمىنىڭ مەرزىمدى قىزمەتتەگى اسكەري قىزمەتشىسى جازاتايىم جاعدايدا قايتىس بولدى. بۇل تۋرالى "وڭتۇستىك" وڭىرلىك قولباسشىلىعىنىڭ باسپا ءسوز قىزمەتى حابارلادى.
جاۋىنگەرلىك دايىندىق جوسپارىنا سايكەس، 5571 اسكەري ءبولىمىنىڭ 1 جەدەل ماقساتتاعى باتالون جەكە قۇرامى 2022 جىلعى 8-13 تامىزى ارالىعىندا 5574 اسكەري ءبولىمىنىڭ وقۋ ورتالىعىندا دالالىق جاتتىعۋدا بولعان.
"2022 جىلعى 9 تامىزدا ساعات 20:55 شاماسىندا قاتتى داۋىل كوتەرىلىپ، جەل سالدارىنان ساربازدار ورنالاسقان شاتىر قالاشىعى بۇلىنە باستاعان. قاتارداعى ا.ن. شاحيموۆ ارىپتەستەرىنىڭ ءقاۋىپسىز ورىنعا شىعۋىنا كومەكتەسىپ ءجۇرىپ شاتىردان سوڭعى بولىپ شىققان كەزدە، شاتىردىڭ تەمىر جاقتاۋى باسىنا ءتيىپ جاراقات العان. قاتارداعى ا.ن. شاحيموۆقا جەدەل مەديسينالىق كومەك كورسەتىلىپ، سانيتارلىق كولىكپەن قونايەۆ قالاسىنداعى قالالىق اۋرۋحاناعا جەتكىزىلگەن. قالالىق اۋرۋحانا دارىگەرلەرى ساربازدى قۇتقارا المادى. قاتارداعى ا.ن. شاحيموۆ ءوزىنىڭ جانقيارلىق ارەكەتىمەن جولداستارىن قۇتقارىپ، وكىنىشكە قاراي ءوزى قاتتى سوققىدان قازا بولدى. دەرەك تۋرالى كەزەكشى قىزمەت جەلىسى بويىنشا ءتيىستى ورگاندارعا حابارلاندى. وقيعانىڭ ءمان-جايى انىقتالىپ، تەرگەۋ جۇمىستارى جۇرگىزىلىپ جاتىر. قىزمەتتىك تەكسەرىس تاعايىندالدى. ق ر ۇلتتىق ۇلاننىڭ باس قولباسشىلىعى جانە "وڭتۇستىك" وڭىرلىك قولباسشىلىعى مەرزىمدىك قىزمەت اسكەري قىزمەتشىسى ا.ن. شاحيموۆتىڭ اتا-اناسى مەن جاقىندارىنا ورنى تولماس قايعىعا ورتاقتاسىپ، كوڭىل ايتادى" دەلىنگەن حابارلامادا.
ا.ن. شاحيموۆ 2003 جىلى تۋعان. ۇلتتىق ۇلان قاتارىندا 2022 جىلدىڭ كوكتەمىندە اقمولا وبلىسى كوكشەتاۋ قالالىق قورعانىس ىستەرى جونىندەگى دەپارتامەنتىمەن شاقىرىلعان.
پىكىر قالدىرۋ