ەلدەگى ەڭ ءىرى مەگاپوليس الماتىدا وقۋ جىلى قارساڭىندا ادەتتەگىدەي پاتەر جالداۋ اقىسى قىمباتتاعان. ماماندار قىمباتشىلىقتىڭ شىرقاۋ شەگى ءالى الدا ەكەنىن ايتادى.
Krisha.kz ساراپشىلارىنىڭ دەرەگىنشە، تامىزدىڭ باسىندا 1-3 بولمەلى جالدامالى پاتەرلەر شىلدەگە قاراعاندا 15 پايىزعا قىمباتتاعان. سونىڭ ىشىندە 2 بولمەلى پاتەردى جالداۋ 25 پايىزعا، 1 بولمەلىلەردىكى 7 پايىزعا، 3 بولمەلى پاتەرلەرلەردىڭ جالداۋ اقىسى 14 پايىزعا جوعارىلاعان. 9 تامىزداعى جاعداي بويىنشا الماتىداعى جالدامالى پاتەرلەردەگى شارشى مەتردىڭ ورتاشا قۇنى 4900 تەڭگەگە جەتكەن.
تامىزدىڭ باسىندا 1-بولمەلى پاتەرلەردىڭ ورتاشا جالداۋ اقىسى ايىنا 150 مىڭ تەڭگە، 2-بولمەلىلەر 250 مىڭ تەڭگە، 3 بولمەلىلەر 319 مىڭ تەڭگەگە دەيىن وسكەن.
جالداۋ قۇنى پاتەردىڭ ورنالاسقان جەرىنە كوپ بايلانىستى. ءتۇرلى اۋداندارداعى ءبىر فورماتتاعى پاتەرلەردىڭ جالداۋ قۇنىنداعى ايىرماشىلىق كەي جەرلەردە 200 مىڭ تەڭگەگە دەيىن جەتكەن.
2-بولمەلى پاتەرلەر بوستاندىق، مەدەۋ جانە جەتىسۋ اۋداندارىندا قىمباتتاسا، 3-بولمەلى پاتەرلەردىڭ جالداۋ قۇنى مەدەۋ، بوستاندىق، اۋەزوۆ اۋداندارىندا شارىقتاي تۇسكەن. ال جالپى قالا بويىنشا المالى، بوستاندىق، مەدەۋ اۋداندارىندا پاتەر جالداۋ قالعان اۋداندارعا قاراعاندا قىمباتىراق.
ماماندار الداعى ۋاقىتتا سۇرانىس ارتاتىنىنا بايلانىستى جالدامالى پاتەرلەردىڭ قۇنى قىمباتتاي ءتۇسىپ، باسپانا نارىعىنداعى ساپىرىلىس قازان ايىنا دەيىن جالعاسادى دەپ وتىر.
پىكىر قالدىرۋ