«ابايدى ارداقتاۋ – ونىڭ دۇنيەتانىمدىق قاعيدالارىن ۇستانۋ، وسيەتىنە ادال بولۋ دەگەن ءسوز»، - دەپ ەلباسى قاسىم-جومارت توقايەۆ، اباي كۇنىن مەرەكەلەۋدىڭ ماقساتى مەن فورماتىن ايقىنداپ بەرگەن بولاتىن. ەلىمىزدە اباي كۇنى 2020 جىلدان باستاپ، جىل سايىن 10 تامىزدا اتاپ وتىلەدى. بيىل العاش رەت ۇلى اعارتۋشى، رەفورماتور، ويشىل جانە اقىننىڭ وتانى بۇل كۇندى جاڭا مارتەبەدە قارسى الىپ وتىر. بۇل تۋرالى اباي وبلىسىنىڭ مادەنيەت باسقارماسىندا ايتىلدى.

1845 جىلدىڭ 10 تامىزىندا قازاق حالقىنىڭ ۇلى اقىنى دۇنيەگە كەلدى دەپ ەسەپتەلەدى. مىنە، ءدال وسى كۇنى قازاقستاندا 2 جىل بولدى اباي كۇنى مەرەكەسى اتاپ وتىلۋدە. «ماسەلە مەرەيتويدا ەمەس – تۇعىرلى تۇلعانىڭ تۋىندىلارىنان تەرەڭ ءتالىم الۋدا. ابايدىڭ رۋحىنا تاعزىم ەتۋ – ونىڭ قاعيداتىن ۇستانۋ، اماناتىنا ادال بولۋ. سوندا عانا جاس ۇرپاقتىڭ ساناسىنا قاستەرلى قۇندىلىقتاردى سىڭىرەمىز»، - دەدى مەملەكەت باسشىسى ءوزىنىڭ «اباي - رۋحاني رەفورماتور» اتتى ماقالاسىندا. ۇلى اقىننىڭ تۋعان جەرى بيىل مەرەكەنى جاڭا مارتەبەدە قارسى الدى.

- بيىل ءبىز مۇقيات دايىندالدىق. بىزدە ابايعا ارنالعان ونكۇندىك ءوتتى. شاراعا اباي وبلىسىنىڭ بارلىق قالالارى مەن اۋداندارى قاتىستى. ءىس-شارالار كونسەرتتەر مەن فەستيۆالدارمەن شەكتەلمەيدى. ءبىزدىڭ باستى مىندەتىمىز – جەرلەستەرىمىزدى، وسى ولكەدەن شىققان تۋمالاردى ۇلى بابامىزدىڭ رۋحاني مۇراسىنىڭ اينالاسىنا بىرىكتىرۋ بولىپ تابىلادى. ەڭ باستىسى، جاستاردى اباي قۇنانبايەۆتىڭ شىعارماشىلىعىنا، فيلوسوفياسىنا باۋلۋ، ونى زەرتتەۋگە دەگەن قىزىعۋشىلىقتارىن وياتۋ. اباي ويى - تەرەڭ ۇلى تۇلعا، ونىڭ شىعارمالارى بارلىق ۋاقىتتا دا وزەكتى، سوندىقتان زەرتتەۋشىلەر ءۇشىن بۇل باعىتتاعى جۇمىستار جەتەرلىك، - دەيدى اباي وبلىسى مادەنيەت باسقارماسىنىڭ رەسمي وكىلى ايدار يبرايەۆ.

سپيكەردىڭ ايتۋىنشا، بۇل كۇننىڭ باستى وقيعاسى جەرلەستەر فورۋمى بولدى. ۇلى اقىننىڭ جەرىندە بۇرىن-سوڭدى وسىندا تۇرىپ، جۇمىس ىستەگەن نەمەسە ءقازىر سەمەيدە جانە وعان جاقىن اۋدانداردا ءوز قىزمەتىن جالعاستىرىپ جۇرگەن ادامدار جينالدى. قاتىسۋشىلار ابايدىڭ قۇرمەتىنە اتالعان مۋزەي، تەاتر سىندى مادەني نىساندارمەن تانىسىپ، «ارەنا» مادەني-سپورت كەشەنىندە بولدى.

مەرەكە سوڭىندا سەمەي قالاسىنىڭ اباي اتىنداعى تەاترىندا قازاقستان جۇلدىزدارىنىڭ قاتىسۋىمەن «ۇلى دالا-ۇلى اباي» گالا – كونسەرتى ءوتتى.

شقو اقپارات ورتالىعى