ساياساتتانۋشى، نامىس باستاماشىل توبىنىڭ جەتەكشىسى سانجار بوقايەۆ كۆازيمەملەكەتتىك سەكتورعا قارايتىن ۇلتتىق كومپانيالار باسقارما ءتوراعاسى مەن ديرەكتورلار كەڭەسى مۇشەلەرىنە اي سايىن بونۋس تۇرىندە قىرۋار قارجى بەرىپ وتىرعانىن ءمالىم ەتتى.

ماسەلەن، قازاقتەلەكوم 2021 جىلى باسقارمانىڭ ءبىر مۇشەسىنە اي سايىن 4 ميلليون 633 مىڭ تەڭگە بەرىپ وتىرعان.

قازمۇنايگاز كومپانياسى 2020 جىلى اي سايىن ديرەكتورلار كەڭەسىنىڭ مۇشەسىنە 4 ميلليون 868 مىڭ تەڭگە تولەگەن.

قازاتومپروم ديرەكتورلار كەڭەسى مەن باسقارما مۇشەلەرىنە 2021 جىلى 1 ميلليارد تەڭگەدەن استام اقشا تولەگەن. سوندا 1 ادام اي سايىن 7 ميلليون تەڭگەگە جۋىق اقشا الىپ بولىپ تۇر.

قازاقستان تەمىر جولى اي سايىن دك مۇشەسىنە 4 ميلليون تەڭگەگە جۋىق تولەيدى.

سانجار بوقايەۆ ديرەكتورلار كەڭەسىنىڭ مۇشەسى شتاتتىق قىزمەتكەر ەمەستىگىن، ايىنا بىر-ەكى رەت كەلىپ-كەتەتىن تاۋەلسىز باقىلاۋشى ەكەنىن اتاپ ءوتتى.

ونىڭ ايتۋىنشا، كومپانيا قىزمەتى قانشالىقتى ءتيىمسىز بولسا، بونۋستى سونشالىقتى كوپ تولەيتىنىن انىقتاعان.ايتالىق قازىنا كاپيتال مەنەدجمەت ۇلتتىق كومپانياسىنىڭ تابىسى 13 ەسە ءتۇسىپ كەتكەنىنە قاراماستان، بونۋس كولەمى 36 پايىزعا ارتقانىنا تاڭ. 

ول ءتيىمسىز ۇلتتىق كومپانيالار ءوزى مەن ديرەكتورلار كەڭەسى مۇشەلەرىنە مۇنداي جوعارى بونۋس تاعايىنداماۋى كەرەك دەپ سانايدى. 

بوقايەۆ كۆازيمەملەكەتتىك سەكتورداعى قاراجات بيۋدجەتتەن ءبولىنىپ وتىرعاندىقتان، ونى باقىلاۋ كەرەكتىگىن جەمقورلىققا قارسى قىزمەت قاپەرىنە سالا وتىرىپ، ۇكىمەت كۆازيمەملەكەتتىك سەكتوردىڭ تيىمدىلىگىن ءجىتى باقىلاپ وتىرۋى كەرەكتىگىن ايتتى. ولاي بولماعان جاعدايدا باسقارما مەن ديرەكتورلار كەڭەسىندە كىم وتىرعانىن قازبالاي باستايتىنىن جەتكىزدى.  قازبالاۋ بارىسىندا ول جەرلەردە ەلدەگى اسا لاۋازىمدى تۇلعالارعا جاقىن ادامدار وتىرعانى انىقتالاتىنىنا سەنىمدى.