قازگيدرومەت جازدىق بيداي مەن كۇنباعىستىڭ ونىمدىلىگىنە بايلانىستى اگرومەتەورولوگيالىق بولجامدى جاريالادى.
قازگيدرومەت ماماندارىنىڭ ايتۋىنشا، ەسەپتىك دەرەكتەرگە سايكەس جانە قالىپتاسقان، كۇتىلەتىن اگرومەتەورولوگيالىق جاعدايدى ەسكەرگەندە رەسپۋبليكانىڭ سولتۇستىك جارتىسىندا جازدىق بيدايدىڭ ونىمدىلىگى كوبىنەسە ورتاشا كوپ جىلدىق مانگە جۋىق، ال باتىس قازاقستان جانە اقتوبە وبلىستارىنىڭ باسىم بولىگىندە ورتاشا كوپ جىلدىق ماننەن جوعارى بولادى.
سولتۇستىك قازاقستان وبلىسىنىڭ جامبىل، قىزىلجار جانە اققايىڭ اۋداندارىندا، قوستاناي وبلىسىنىڭ قامىستى اۋدانىندا، شىعىس قازاقستان وبلىسىنىڭ كاتونقاراعاي جانە التاي اۋداندارىندا بيدايدىڭ ونىمدىلىگى نورمادان جوعارى دەپ بولجانىپ وتىر.
ال كۇنباعىستىڭ ونىمدىلىگى قوستاناي جانە پاۆلودار وبلىستارىندا ورتاشا كوپ جىلدىق مانگە جۋىق، ال شىعىس قازاقستان وبلىسىندا ورتاشا كوپ جىلدىق ماننەن جوعارى بولادى دەپ كۇتىلەدى.
پىكىر قالدىرۋ