وبلىستار بولىنگەننەن كەيىن شقو 342 جالپى ءبىلىم بەرەتىن مەكتەپ جۇمىس ىستەيتىن بولادى. ەكى اپتادان كەيىن مەكتەپ ەسىكتەرى 95 138 وقۋشىعا ايقارا اشىلادى، ونىڭ ىشىندە 9 728 ءبىرىنشى رەت پارتاعا وتىرادى. وڭىرلىك كوممۋنيكاسيالار قىزمەتىندە وتكەن بريفينگ بارىسىندا ءبىلىم باسقارماسىنىڭ وكىلدەرى جاڭا وقۋ جىلىنا دايىندىق بارىسى تۋرالى ايتىپ بەردى.

تامىزدىڭ ەكىنشى جارتىسى  - مۇعالىمدەر، وقۋشىلار جانە ولاردىڭ اتا-انالارى ءۇشىن ءداستۇرلى تۇردە قاربالاس كەزەڭ بولىپ تابىلادى. شىعىس قازاقستاندا وقۋ جىلىنا بەلسەندى دايىندىق ءجۇرىپ جاتىر. ءبىلىم بەرۋ ۇيىمدارىنا كۇردەلى جانە اعىمداعى جوندەۋ جۇرگىزۋ ءۇشىن 1 ملرد. تەڭگە ءبولىندى. جاڭا موديفيكاسيا كابينەتتەرى جاڭارتىلۋدا، ونىڭ ىشىندە اعىمداعى جىلى ءوڭىردىڭ 17 مەكتەبىنە 129،6 ملن.تەڭگەگە 22 كابينەت ساتىپ الىندى. مەكتەپتەردە بارلىعى 787 كابينەت ورناتىلعان. ال ريددەر، شەمونايحا قالالارىندا، قاسىم قايسەنوۆ كەنتىندە، ۋرۋنحايكا جانە جولنۇسقاۋ اۋىلدارىندا جاڭا مەكتەپتەر سالىنۋدا.

- وقۋ جىلى باستالعانعا دەيىن بارلىق وقۋشىلار وقۋلىقتارمەن جانە وقۋ-ادىستەمەلىك كەشەندەرمەن قامتاماسىز ەتىلەدى - دەپ اتاپ ءوتتى شىعىس قازاقستان وبلىسى ءبىلىم باسقارماسى باسشىسىنىڭ مىندەتىن اتقارۋشى  اليما اقىلبەك قىزى.

ءوڭىردە  دارىندى بالالارعا ارنالعان 6 مامانداندىرىلعان مەكتەپ بار ەكەنىن اتاپ كەتكەن ءجون.وقۋشىلاردى قابىلداۋ ق ر وقۋ-اعارتۋ مينيسترلىگى وتكىزەتىن ەمتيحاندار قورىتىندىسى بويىنشا جۇزەگە اسىرىلادى. «ق ر وقۋ-اعارتۋ مينيسترلىگىنىڭ بۇيرىعى نەگىزىندە قازىرگى ۋاقىتتا وسى مامانداندىرىلعان مەكتەپتەرگە حالىقتىڭ الەۋمەتتىك وسال توپتارىنان شىققان بالالاردى قوسىمشا قابىلداۋ جۇرگىزىلۋدە. قۇجاتتاردى قابىلداۋ اعىمداعى جىلدىڭ 23 تامىزىنا دەيىن جۇرگىزىلەدى"، - دەپ تولىقتىردى ۆەدومستۆو وكىلدەرى.

سونداي-اق، بريفينگكە قاتىسۋشىلاردىڭ ايتۋىنشا، 2022 جىلى «جالپىعا مىندەتتى وقىتۋ» قورىنىڭ شىعىندارى 1891 ملن.تەڭگەنى قۇرادى. 25 تامىزعا دەيىنگى مەرزىمدە كوپ بالالى جانە از قامتىلعان وتباسىلاردىڭ بارلىق وقۋشىلارى جاڭا مەكتەپ فورماسىمەن جانە اياق كيىممەن قامتاماسىز ەتىلەدى.

سونىمەن قاتار، ەل پرەزيدەنتى قاسىم-جومارت كەمەل ۇلى توقايەۆ جاريالاعان بالالار جىلى اياسىندا وڭىردە «مەكتەپكە جول» اكسياسى وتۋدە. 3 مىڭ 345 بالا مەكتەپ، سپورتتىق كيىم، اياق كيىم، كەڭسە تاۋارلارى تۇرىندە 22 ملن تەڭگەدەن استام سوماعا دەمەۋشىلىك ماتەريالدىق كومەك الدى.

سونىمەن قاتار، ۆەدومستۆودا حابارلاعانداي، ءبىلىم بەرۋ ۇيىمدارىندا بالالار ءۇشىن ءقاۋىپسىز جاعداي جاساۋ ماسەلەسى باسىمدىققا يە. وسى ماقساتتا وبلىستىڭ جالپى ءبىلىم بەرەتىن مەكتەپتەرى مەن مەكتەپكە دەيىنگى مەكەمەلەرىنىڭ 100% بەينەباقىلاۋ جۇيەلەرىمەن جابدىقتالعان.