كەشە، 21 تامىز كۇنى الماتىدا «قانداس مەديسينا ماماندارىنىڭ عىلىمي تالقىسى» دەگەن اتاۋمەن قازاقستان تاۋەلسىزدىگىن العالى ەلگە قىتايدان كەلگەن قانداستاردىڭ ىشىندە مەديسينا سالاسىندا قىزمەت ەتىپ جۇرگەن مامانداردىڭ ارنايى جيىنى ءوتتى. كونفەرەنسياعا «ەل-امان مەديسينا» ورتالىعىنىڭ ديرەكتورى، ىشكى اۋرۋلار كافەدراسى باس دارىگەرىنىڭ ورىنباسارى داستان رازباي ۇلى مەن Damu Business Group قاۋىمداستىعىنىڭ باسقارما ءتوراعاسى قۇمار جۇماحان باستاماشىل بولعان.
داستان رازباي ۇلى جيىن ەل ەگەمەندىگىن العان 30 جىلدا ادام جانىنىڭ اراشاسى بولعان دارىگەرلەردى، مەديسينا ماماندارىن ەلگە، حالىققا تانىستىرۋ، سول ارقىلى ولاردىڭ ەڭبەگىن كوپشىلىككە جەتكىزۋدى ماقسات ەتەتىنىن ايتتى.
– وسى جينالىستى وتكىزۋگە كومەك كورسەتكەن Damu Business Group قاۋىمداستىعىنا، سپيكەر اعالارعا، باستامانى ءبىرىنشى بولىپ كوتەرگەن سەرىك دۇيسەنبى ۇلى اعامىزعا، كەلىپ قاتىسىپ جاتقان بارلىق ارىپتەستەرىمە العىسىمدى بىلدىرەم، – دەدى جيىندى اشقان «ەل-امان مەديسينا» ورتالىعىنىڭ ديرەكتورى.
Damu Business Group قاۋىمداستىعىنىڭ باسقارما ءتوراعاسى قۇمار جۇماحان ءىس-شارا بىرلىكتىڭ، ىنتىماقتىڭ ارقاسىندا جۇزەگە اسىپ وتىرعانىن اتاپ ءوتتى.
جيىن بارىسىندا ماماندار ەلىمىزدەگى مەديسينا سالاسىن بىرلەسە دامىتۋ جولدارىن تالقىلاپ، سالاداعى جەكەلەگەن ماسەلەلەر تۋرالى ءوز تاجىريبەلەرى نەگىزىندە باياندامالار جاسادى.
قازاقستان ۇلتتىق عىلىمي مەديسينا ورتالىك جۇرەك ينستيتۋتىنىڭ ديرەكتورى اسقار قادىلبەك ۇلى سوزىلمالى جۇرەك جەتىسپەۋشىلىگىن ەمدەۋدەگى جاڭا تەحنولوگيالار تۋرالى جاڭالىقتاردى ءبولىستى.
«Kelun-Kazpharm» جشس-نىڭ قۇرىلتايشىسى جانە اتقارۋشى ديرەكتورى مەرەي سلامۋلى كومپانيانىڭ دامۋ بارىسى جونىندە ايتسا، ءال-فارابي اتىنداعى قازاق ۇلتتىق زەرتتەۋ ۋنيۆەرسيتەتى دارىلىك وسىمدىكتەردى عىلىمي زەرتتەۋ ورتالىعىنىڭ ديرەكتورى حيميا جانە ورگانيكالىق زاتتار، تابيعي قوسىلىستار مەن پوليمەرلەر تەحنولوگياسى كافەدراسىنىڭ پروفەسسورى، PhD دوكتورى جانار جەڭىس قىزى “قازاقستاندا وسەتىن دارىلىك وسىمدىكتەردىڭ فيتوحيميالىق بەيىنى جانە بيولوگيالىق بەلسەندىلىگى” اتتى عىلىمي بايانداما جاساسا،
ونكولوگيا جانە ومىراۋ بەزى، قالقانشا بەزىنىڭ مامانى جەڭىس قاليازىم ومىراۋبەز راگىنىڭ قولتىق استىنداعى ليمفا تۇيىندەرىنىڭ بيوپسياسى تۋرالى ايتتى.
الماتى شىعىس مەديسينا ورتالىعىنىڭ قىزمەتكەرى ەرلان قازەز ۇلى ءداستۇرلى جۇڭگو مەديسيناسى مەن ينە ارقىلى ەمدەۋدىڭ ماڭىزى جانە ونىڭ اۋرۋلاردى ەمدەۋدەگى ەرەكشە رولىنە توقتالسا، ۇلتتىق عىلىمي مەديسينالىق ورتالىقتىڭ ينتەرۆەنسيوندى كارديولوگيا ءبولىمىنىڭ مەڭگەرۋشىسى بەگلان ستامبول ۇلى «سوزىلمالى تولىق كورونارلىق وككليۋزياعا ارنالعان ينتەرۆەنسيالىق تەراپيانىڭ ۇسىنىلعان باعىتى»، ورتوپەد، سۇيەك مامانى مۇقاي باۋىرجان «بەل ومىرتقا ارالىق تاقسىسىنىڭ بۇلتيىپ شىعۋى»، الماتى بۋچان كلينيكاسىنىڭ يگلوتەراپيەۆتى اسقار داكەن ۇلى مرت ارقىلى ومىرتقا اۋرۋلارىن انىقتاۋ، پۋلمونولوگ دۋتان ساكەن تۋبەركۋلەزدى ساۋلەلىك دياگنوستيكالاۋ جونىندەگى تاجىريبەلەرىن ورتاعا سالدى.
جۇرەك-قان تامىرلار جۇيەسىنىڭ دارىگەرى گۇلناز سەيدوللا «انتيبيوتيك دارىلەردىڭ كلينيكادا قولدانىلۋى» تۋرالى عىلىمي جۇمىسىن نازارعا ۇسىندى.
كونفەرەنسيا بارىسىندا كۇرمەۋى كوپ كۇردەلى ماسەلەلەر تۋرالى ايتىلدى
ايتالىق، شەت ەلگە ەمدەلىپ جاتقان ادامدارعا اناليز جاساۋ، سول اپپارتتاردى كاسىپكەرلەردىڭ كومەگىمەن ەلگە اكەلۋ ماسەلەسى، ناۋقاستىڭ شەت ەلگە بارعانداعى جول شىعىنىن، ەمدەلۋ اقىسىن وتەۋ جاعدايلارى، قارجى جەتىسپەۋىنەن شەت ەلدەگى ەم توقتاپ قالعان جاعدايلاردى شەشۋ جايى، شەتەلدە ەمدەلۋگە بارعاندار كەزىگەتىن ءتىل ماسەلەسىن شەشۋ جولدارى، مەديسينا سالاسىنان بەيحابار ماماننىڭ دارىگەر بولۋى، ناۋقاستاردىڭ شەت ەلگە بارۋىنان وتاندىق مەديسينانىڭ السىرەۋى، تازا قازاق تىلىندە قىزمەت كورسەتەتىن ەمحانانىڭ جوقتىعى سەكىلدى تۇيىتكىلدەردى شەشۋ امالدارى تۋرالى ويلار ايتىلىپ، ۇسىنىستار جەتكىزىلدى.
