قازاقستاندا سارى ماي قىمباتتادى. ەل بويىنشا باعانىڭ ءوسۋى 15%-دى قۇرايدى، ال كەيبىر وڭىرلەردە ول ودان دا جوعارى. ماسەلەن، ماڭعىستاۋ وبلىسىندا ماي باعاسى جىل باسىنان بەرى بىردەن 29%-عا كوتەرىلگەن. مۇنداي دەرەكتەردى Energyprom.kz پورتالى كەلتىرىپ وتىر.

ەل بويىنشا 2022 جىلعى قاڭتاردان شىلدەگە دەيىن 13،9 مىڭ توننا سارى ماي وندىرىلگەن. بۇل – وتكەن جىلمەن سالىستىرعاندا 12،6%-عا از.

شىلدەدە تۇزدالماعان سارى مايدىڭ بولشەك ساۋداداعى قۇنى كەلىسىنە 3،3 مىڭ تەڭگەگە دەيىن جەتكەن. پاۆلوداردا مايدىڭ كەلىسى 2،7 مىڭ تەڭگەدەن ساتىلسا، اتىراۋدا 4،3 مىڭ تەڭگەگە دەيىن قۇبىلعان.

ايتارلىقتاي قىمباتشىلىق ماڭعىستاۋ وبلىسىندا بايقالىپ وتىر. ول جاقتا ماي باعاسى بىردەن 29%-عا كوتەرىلسە، شىمكەنتتە باعانىڭ ءوسۋى 26،7%، ال جامبىل وبلىسىندا 26،4%-دى قۇراعان.

قىمباتشىلىق نۇر-سۇلتاندا 3%، الماتىدا 5،6%، پاۆلودار وبلىسىندا 7،2% شاماسىندا.

2022 جىلدىڭ قاڭتار-مامىر ايلارىندا ماي ءوندىرىسى وتكەن جىلمەن سالىستىرعاندا 12%-عا تومەندەگەن. يمپورت، كەرىسىنشە، ءبىر جىلدا بىردەن 83،5%-عا ءوستى، بۇل – نارىقتاعى يمپورتتاۋشىلاردىڭ ۇلەسىن 16،4%-دان 29%-عا دەيىن ارتتىرعان. ءقازىر قازاقستاندىق ماي وندىرۋشىلەر حالىقتىڭ وسى ونىمگە دەگەن قاجەتتىلىگىنىڭ 71%-ىن قامتاماسىز ەتەدى.