ساياسي تۇتقىندار مەن قاڭتار وقيعاسى قۇرباندارىنا قولداۋ كورسەتۋ ءۇشىن قۇرىلعان قوعامدىق "اراشا" كوميتەتى ازاماتتىق بەلسەندى، تىركەلمەگەن دەموكراتيالىق پارتيا باستاماشىل توبىنىڭ جەتەكشىسى "جانبولات مامايدىڭ ىسىندەگى تەرگەۋشىلەردىڭ زاڭسىز تاسىلدەرى تۋرالى" مالىمدەمە جاريالادى. مالىمدەمە ءماتىنىن بەلسەندىنىڭ زايىبى، جۋرناليست، قۇقىققورعاۋشى ينگا يمانباي ءوزىنىڭ facebook پاراقشاسىندا جاريالادى.
مالىمدەمەدە كوميتەتكە قاڭتار وقيعاسىنا قاتىستى ىستەردى تەرگەيتىن ۆەدومستۆوارالىق تەرگەۋ-وپەراتيۆتى توپ تەرگەلىپ جاتقانداردى جانبولات مامايعا قارسى كۋالىك بەرۋگە ماجبۇرلەپ جاتقانى تۋرالى اقپارات جەتكەنى ايتىلادى. كوميتەت اقپارات راستالسا، وندا بۇل ارەكەتتى قاماۋدا وتىرعاندار قۇقىعىن ورەسكەل بۇزۋ فاكتىسى رەتىندە باعالاۋعا بولادى دەپ سانايدى.
"بۇل اقپاراتقا سەنەر بولساق، قامالعاندارعا پروسەسۋالدىق كەلىسىمگە كەلۋدى ۇسىنا وتىرىپ، ەگەر ولار ج. مامايعا جالا جاپسا، ولاردى بوساتىپ جىبەرەتىندەرىن، ال كەلىسپەسە، ۇزاق جىلعا باس بوستاندىعىنان ايىرىلۋى مۇمكىن ەكەنىن ايتىپ قورقىتاتىن كورىنەدى. بۇل اقپارات راستالىپ جاتسا، بۇنى ج.مامايدىڭ جانە وزدەرىن جالعان كۋالىك بەرۋگە، ياعني، قىلمىسقا ماجبۇرلەپ جاتقان، سوتقا دەيىنگى تەرگەۋ كەزەڭىندە قاماۋدا وتىرعان باسقا دا جانداردىڭ قۇقىلارىن بۇزاتىن ورەسكەل فاكتى دەپ سانايمىز. بۇل اقپارات بويىنشا، تەرگەۋشىلەرگە رەسمي ەمەس ول بۇيرىقتى ۆەدومستۆو ارالىق تەرگەۋ-وپەراتيۆتى توپتىڭ جەتەكشىسى ك. كۇنعوجينوۆ بەرگەن كورىنەدى. مۇنىڭ ءبارى ج. مامايعا قارسى ءىستىڭ ساياسي استارى بار ەكەنىن ءبىلدىرىپ، ونىڭ وزىنە تاڭىپ وتىرعان ىستەرگە قاتىسى بار دەگەن دالەلدەرگە كۇمان كەلتىرەدى. ويتكەنى، باسقاشا بولسا، تەرگەۋشىلەر بوگدە ادامداردى وعان جالا جابۋعا ماجبۇرلەمەگەن بولار ەدى" دەلىنگەن كوميتەت مالىمدەمەسىندە.
سونداي-اق مالىمدەمەدە اقپارات راستالىپ جاتقان جاعدايدا، وندا قاڭتار وقيعاسى بويىنشا ءوتىپ جاتقان، اسىرەسە، ساياسي وپپوزيسيا مەن ازاماتتىق بەلسەندىلەرگە قاتىستى تەرگەۋلەر بەلگىلى ءبىر ساياسي ماقساتپەن، زاڭسىز تەرگەۋ امالدارىن قولدانا وتىرىپ ءجۇرىپ جاتقانىن كورسەتەتىنى ايتىلادى.
"وسى مالىمدەمەمىز ارقىلى ءبىز تەك قوعامعا عانا ۇندەۋ تاستاپ وتىرعان جوقپىز. سونداي-اق، قىسىم جاسالىپ جاتقاندارعا دا، تاريحتا ەش نارسەنىڭ دە – ساتقىندىق تا، وتىرىك تە – ۇمىتىلمايتىنىن ەسكەرتە وتىرىپ، ولاردىڭ وزدەرىن دە، قورعاۋشىلارى مەن تۋىستارىن دا مۇنداي تەرگەۋشىلەردىڭ جەتەگىندە كەتپەۋگە شاقىرامىز. ءبىز بۇل اقپاراتتىڭ ءجىتى تەكسەرىلۋىن، ال ول راستالىپ جاتسا، كىنالىلەردى جاۋاپقا تارتۋدى تالاپ ەتەمىز. ال، ءوز تاراپىمىزدان، وسى سياقتى قانداي دا ءبىر ىس-ارەكەتتى جاريالاپ، قوعامنىڭ نازارىن اۋدارىپ وتىراتىنىمىز تۋرالى مالىمدەيمىز" دەيدى كوميتەتتەگىلەر.
پىكىر قالدىرۋ