وقۋ-اعارتۋ ءمينيسترى اسحات ايماعامبەتوۆ پەن ىشكى ىستەر ءمينيسترى مارات احمەتجانوۆ جاڭا وقۋ جىلى قارساڭىندا وقۋشىلاردىڭ قاۋىپسىزدىگى ماسەلەلەرى بويىنشا كەڭەس وتكىزدى.
كەزدەسۋدە وقۋ-اعارتۋ مينيسترلىگى جاڭا وقۋ جىلى قارساڭىندا ىشكى ىستەر مينيسترلىگى وكىلدەرىمەن بىرلەسىپ، وقۋشىلاردىڭ قاۋىپسىزدىگىنە قاتىستى ساباقتار وتكىزەتىنى تۋرالى ايتىلدى. بۇل ساباقتارعا ءبىلىم بەرۋ ۇيىمدارىنىڭ وكىلدەرى دە، قۇقىق قورعاۋ ورگاندارىنىڭ وكىلدەرى دە قاتىسادى.
– قىركۇيەكتىڭ باسىنان باستاپ 5 مىڭنان استام پوليسيا قىزمەتكەرى مەكتەپتەرگە بارىپ، پروفيلاكتيكالىق ساباقتاردى بىرلەسىپ وتكىزەدى. بۇعان مۇعالىمدەر، ديرەكتوردىڭ ورىنباسارلارى جانە ديرەكتورلار بەلسەنە قاتىسادى. وقۋ جىلىنىڭ باسىندا ىشكى ىستەر ورگاندارىنان مەكتەپ جانىنداعى كەزەكشىلىكتى كۇشەيتىپ، قاجەت جەرلەرگە ارنايى جول بەلگىلەرىن قويىپ، الدىن الۋ شارالارىن جۇرگىزۋدى سۇرايمىز. بارلىق مەكتەپ اۆتوبۋستارىن، سونداي-اق قاۋىپسىزدىك جۇيەلەرىن تەكسەرۋدى اياقتاۋ قاجەت. بۇل جۇمىستى بىرلەسىپ اتقارامىز دەپ ويلايمىن، – دەدى وقۋ-اعارتۋ ءمينيسترى.
ىشكى ىستەر مينيسترلىگىنىڭ باسشىسى مارات احمەتجانوۆ ۆەدومستۆونىڭ بارلىق جەكە قۇرامى وقۋشىلار اراسىندا ءتۇسىندىرۋ جۇمىستارىن جۇرگىزەتىنىن اتاپ ءوتتى. وقۋشىلارعا ولاردىڭ قۇقىقتارى مەن مىندەتتەرى ءتۇسىندىرىلىپ، قۇقىق بۇزۋشىلىقتىڭ الدىن الۋ، توتەنشە جاعدايلاردا قالاي ارەكەت ەتۋ كەرەگى ايتىلادى. ءىىم باسشىسى ەلوردالىق گيمنازيالاردىڭ بىرىنە ءوزى دە باراتىنىن اتاپ ءوتتى.
پىكىر قالدىرۋ