شىعىس قازاقستان وبلىسى توتەنشە جاعدايلار دەپارتامەنتى كۇرشىم اۋدانىنداعى مارقاكول ورمان شارۋاشىلىعى اۋماعىندا ورمان ءورتى ءالى سوندىرىلمەگەنىن مالىمدەدى، دەپ حابارلادى التاينيۋس.

ءقازىر ءورتتىڭ الدىن الا اۋماعى 1 300 گا قۇرايدى. جاقىن ورنالاسقان ەلدى مەكەندەرگە ءقاۋىپ ءتونىپ تۇرعان جوق. 

ءورتتى سوندىرۋشىلەرگە تاۋ بەدەرلەرى مەن اۋا رايى قيىندىق تۋدىرۋدا. سوندىقتان "مي-8" جانە "ەۆروكوپتەر" تىكۇشاقتارى تارتىلعان. بۇگىن ءورت بولعان جەرگە سۋاعار قۇرىلعىسى بار ق ر تجم قازاۆياقۇتقارۋ مي-171 تىكۇشاعى قوسىمشا كومەككە كەلمەك.

"التاي اۋدانىندا زىريان ورمان شارۋاشىلىعى ورتەندى. ءتىلسىز جاۋدىڭ الدىن الا اۋماعى - 800 گەكتاردى قۇرايدى. ءورتتى اۋىزدىقتاۋ ءۇشىن سۋاعار قۇرىلعىسى بار مي-8 تىكۇشاعى،  200-گە جۋىق ادام مەن 29 تەحنيكا جۇمىلدىرىلدى. ەلدى مەكەندەرگە ءقاۋىپ جوق. بۇگىن ءورت بولعان جەرگە سەمەي قالاسىنىڭ №68303 اسكەري ءبولىمىنىڭ سۋاعار قۇرىلعىسى بار ق ر قورعانىس مينيسترلىگىنىڭ مي-17 تىكۇشاعى، جەكە قۇرامنىڭ 50 ادامى جانە 4 بىرلىك تەحنيكاسى كومەككە قوسىمشا كەلەدى"، - دەدى شقو تجد باسپا ءسوز قىزمەتى.