8 قىركۇيەكتە ش.ش.ءۋاليحانوۆ اتىنداعى تاريح جانە ەتنولوگيا ينستيتۋتىندا "قازاقستانداعى 1930-شى جىلدارداعى جاپپاي اشارشىلىق جانە قازاقتاردىڭ شەكتەس اۋماقتارعا ءماجبۇرلى قونىس اۋدارۋى: زاماناۋي ءتۇسىنۋ جانە عىلىمي باعالاۋ ماسەلەلەرى" تاقىرىبىنداعى حالىقارالىق عىلىمي-تاجىريبەلىك كونفەرەنسيا ءوتتى.

كونفەرەنسيا قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ قارجىلاي قولداۋىمەن  "حح عاسىردىڭ 30-جج. باسىنداعى جاپپاي اشارشىلىق كەزەڭىندەگى ورتا ازيا رەسپۋبليكالارى مەن رەسەيدەگى قازاق كوشپەلىلەرى: ورنالاسۋى مەن بەيىمدەلۋى" جوباسىن ىسكە اسىرۋ شەڭبەرىندە ۇيىمداستىرىلدى.

قاشىقتىقتان وتكىزىلگەن كونفەرەنسياعا عالىمدار، قوعام قايراتكەرلەرى، دوكتورانتتار، ماگيسترانتتار، مەكتەپتەگى تاريح ءپانىنىڭ مۇعالىمدەرى مەن ستۋدەنت جاستار قاتىستى. اتاپ وتسەك، رەسەي عىلىم اكادەمياسى سب تاريح ينستيتۋتىنىڭ ديرەكتورى رىنكوۆ ۆاديم ماركوۆيچ (رف، نوۆوسيبيرسك قالاسى)، قىرعىز رەسپۋبليكاسى سىرتقى ىستەر مينيسترلىگى ديپلوماتيالىق اكادەمياسىنىڭ پرورەكتورى، ت.ع.د، پروفەسسور ز.ك. كۋرمانوۆ (بىشكەك قالاسى، قىرعىزستان)، تاشكەنت مەملەكەتتىك پەداگوگيكالىق ۋنيۆەرسيتەتىنىڭ الەم تاريحى كافەدراسىنىڭ دوسەنتى، ت.ع.ك. ب.ا. پاسيلوۆ (تاشكەنت قالاسى، وزبەكستان)، جانە رەسەي فەدەراسياسىنان: رەسەي عىلىم اكادەمياسىنىڭ ءسىبىر ءبولىمىنىڭ تاريح ينستيتۋتىنىڭ جەتەكشى عىلىمي قىزمەتكەرى ن.ن. ابجالەي (نوۆوسيبيرسك قالاسى، رف)، ءوز ەلىمىزدەن مەملەكەت تاريحيحى ينستيتۋتى ديرەكتورى ت.ع.د.، پروفەسسور ە.ا. ءابىل ە، وسى اتالمىش ينستيتۋتتىڭ ديرەكتور ورىنباسارى ت.ع.د.، پروفەسسور ب.گ. اياعان، قورقىت اتا ات. قىزىلوردا ۋنيۆەرسيتەتىنەن س.ع.د.، پروفەسسور باكىر ابدىجالەل قوشقار ۇلى، ءال-فارابي ات. قۇۋ پروفەسسورى ق.ق. قۇناپينا، قىزىلوردا وبلىسىنىڭ مەملەكەتتىك ارحيۆىنەن د.ا. قالتايەۆا جانە ش.ش. ءۋاليحانوۆ اتىنداعى تاريح جانە ەتنولوگيا ينستيتۋتىنان ت.ع.د.، پروفەسسور س.م. بوربوسوۆ، ت.ع.د.، پروفەسسور و.ح. مۇقاتوۆا، ت.ع.د.، پروفەسسور ا.ي. قۇدايبەرگەنوۆا، PhD دوكتور م.م. قوزىبايەۆا جانە ت.ب. عالىمدار بايانداما جاسادى.

الماتىداعى ش.ش.ءۋاليحانوۆ اتىنداعى تاريح جانە ەتنولوگيا ينستيتۋتى قابىرعاسىندا وتكەن بۇل كونفەرەنسياعا نۇر-سۇلتان، قوستاناي، اقتوبە، اتىراۋ، ورال، قىزىلوردا، تاراز، اقتاۋ، وسكەمەن ورال، شىمكەنت قالالارى ال، شەتەلدەردەن، ماسكەۋ، نوۆوسيبيرسك، تاشكەنت، بىشكەك قالالارىنىڭ جوعارى وقۋ ورىندارىنان، عىلىمي-زەرتتەۋ ينستيتۋتتارىنان، ارحيۆ، مۇراجاي جانە ورتا مەكتەپتەردەن قازاق بوسقىندارى تاقىرىبىنا بەي-جاي قارامايتىن ازاماتتار قاتىسىپ، باياندامالارىن، ۇسىنىستارىن  ورتاعا سالىپ، تالقىلاۋدان وتكىزدى. قورىتا ايتقاندا كونفەرەنسيانى ۇيىمداستىرۋشىلار وسى باياندامالاردى جيناق رەتىندە شىعادى.

بايدالى راۋان، PhD دوكتور، ا.بايتۇرسىن ۇلى اتىنداعى
قوستاناي وڭىرلىك ۋنيۆەرسيتەتى