الماتىدا نارەستەلەردى ساتۋمەن اينالىسقان ۇيىمداسقان قىلمىستىق توپقا قاتىستى تەرگەۋ شارالارى باستالدى، دەپ حابارلادى AstanaTV ارناسى.
ءتارتىپ ساقشىلارىنىڭ دەرەگىنشە، زاڭعا قارسى ارەكەت ەتكەندەر شاقالاقتاردى بالاسى جوق وتباسىلارعا ساتپاق بولعان. بۇگىندە كۇدىكتىلەر ۇستالىپ، ۋاقىتشا ۇستاۋ يزولياتورىنا قامالعان. وقيعاعا قاتىستى سوتقا دەيىنگى تەرگەپ-تەكسەرۋ باستالدى.
"الدىن الا ءسوز بايلاسقان ادامدار توبى وزدەرىنىڭ بالالارىنان باس تارتقىسى كەلەتىن جۇكتى ايەلدەردى جانە بالالارى جوق ەرلى-زايىپتىنى ىزدەگەن. سونداي-اق بالالاردىڭ تۋۋ تۋرالى جالعان كۋالىگىن دايىنداۋمەن اينالىسقانى انىقتالدى. اتالعان فاكتى بويىنشا "كامەلەتكە تولماعانداردى ساتۋ" بابى بويىنشا سوتقا دەيىنگى تەرگەپ-تەكسەرۋ باستالدى" دەدى ىشكى ىستەر مينيسترلىگىنىڭ رەسمي وكىلى شۇعىلا تۇرلىبەك.
كۇدىكتىلەر قىلمىستىق كودەكستىڭ 135-بابى ("كامەلەتكە تولماعاندار ساۋداسى، ادامدار توبىنىڭ الدىن الا ءسوز بايلاسۋىمەن جاسالعان ارەكەت") بويىنشا 9 جىلدان 12 جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
پىكىر قالدىرۋ