كەڭەس جانە رەسەي ەستراداسىنداعى بەلگىلى ءارتىس اللا پۋگاچيەۆا رەسەيدىڭ ۋكرايناعا باسىپ كىرگەنىن اشىق ايىپتاپ، سول ءۇشىن رەسەيدە شەتەل اگەنتى تىزىمىنە ەنگىزىلگەن كۇيەۋى، پاروديست، تەلەجۇرگىزۋشى ماكسيم گالكيندى قولدايتىنىن، ونىمەن پىكىرلەس ەكەنىن ءمالىم ەتتى.
"رەسەي فەداراسياسى ادىلەت مينيسترلىگىنە ۇندەۋ. مەنى سۇيىكتى ەلىمدەگى شەتەل اگەنتى قاتارىنا قوسۋدى سۇرايمىن، ويتكەنى مەن ادال، شىنشىل، رەسەيدىڭ ناعىز جانە ساتىلمايتىن پاتريوتى، وتانىمىزدىڭ وركەندەۋىن قالايتىن، بەيبىت ءومىردى، ءسوز بوستاندىعىن، ەلىمىزدى وقشاۋلاپ ازاماتتار ءومىرىن اۋىرلاتانىن يلليۋزيالىق ماقساتتار ءۇشىن بالالارىمىزدىڭ ولگەنى توقتاعانىن تىلەيتىن كۇيەۋىممەن ءبىر پىكىردەمىن" دەپ جازدى ءارتىس.
اللا پۋگاچيەۆانىڭ 20 ساعات بۇرىن جاريالاعان جازباسى وسى ساتتە 630 مىڭنان استام لايك، 84 مىڭعا جۋىق پىكىر جيناعان. پىكىر جازۋشىلاردىڭ باسىپ كوپشىلىگى ونى قولداپ جاتىر.
ءارتىستىڭ جازباسىندا "ۋكراينا" تۋرالى بىردە-بىر ءسوز جوق. الايدا جۇرتشىلىق جازبانى رەسەي بيلىگىنىڭ باسقىنشىلىعىن ايىپتاۋ دەپ قابىلداپ، ونىڭ ارەكەتىن جوعارى باعالاپ جاتىر.
ماكسيم گالكين رەسەيدىڭ ۋكرايناعا باسقىنشىلىعىن باتىل ءارى اشىق ايىپتاۋشىلاردىڭ ءبىرى. ول اقپان ايىنان بەرى يزرايلدە ءجۇر، كونسەرتتەرىندە سوعىسقا دەگەن سىني كوزقاراسىن جاسىرعان ەمەس. گالكين سوعىستى ايىپتاعان العاشقى كۇندەردە-اق ونىمەن جاسالعان رەسەي تەليەۆيدەنيەسىندەگى جانە جارنامالىق كەلىسىمدەر بۇزىلعان. 16 قىركۇيەكتە رەسەيدەگى "شەتەل اگەنتى" رەەسترىنە ەنگەن.
پىكىر قالدىرۋ