قورعانىس مينيسترلىگى اسكەري بورىشىن وتەگەن ساربازدار جوعارى وقۋ ورنىندا تەگىن ءبىلىم الاتىنىن حابارلادى.
قورعانىس مينيسترلىگى جاڭا جوبا ارقىلى جاستاردىڭ اسكەرگە بارۋعا دەگەن ىنتاسىن ارتتىرۋدى ماقسات ەتكەن.
"جەكە قاسيەتتەرىنە، ۇلگىلى تارتىبىنە جانە مەرزىمدى اسكەري قىزمەتىن وتەۋ كەزەڭىندە جاۋىنگەرلىك دايارلىقتا قول جەتكىزگەن جوعارى ناتيجەلەرىنە قاراي اسكەري قىزمەتشىلەرگە جوعارى وقۋ ورنىنىڭ گرانتى ەسەبىنەن تەگىن جوعارى ءبىلىم الۋ مۇمكىندىگى بەرىلەتىن بولادى"، دەلىنگەن مينيسترلىك حابارلاماسىندا.
جاڭا جوبانى عىلىم جانە جوعارى ءبىلىم مينيسترلىگى قولداپ وتىر. بۇدان بولەك اسكەرگە بارىپ كەلگەندەرگە بىرنەشە جەڭىلدىك جاسالادى. ولار:
- ۇبت-نى ەسەپكە الماي، اڭگىمەلەسۋ ناتيجەسى بويىنشا ەكى جىل ىشىندە اقىلى نەگىزدە جوعارى وقۋ ورنىنا ءتۇسۋ؛
- جوو اسكەري كافەدراسىندا تەگىن وقۋ؛
- اسكەري وقۋ ورىندارىنا ەمتيحانسىز جانە ۇبت-سىز وقۋعا ءتۇسۋ.
"اسكەري وقۋ ورىندارىنا ەمتيحانسىز ءتۇسۋ جانە ازاماتتىق جوعارى وقۋ ورىندارىندا وقۋ گرانتىن الۋ كەزىندە اسكەري قىزمەتشىلەردىڭ وتان الدىنداعى بورىشىن وتەگەن بالالارىنا دا باسىمدىق بەرىلەدى دەگەن جوسپار بار. جوبانى ىسكە اسىرۋ ءۇشىن ءبىلىم بەرۋ سالاسىنداعى زاڭناماعا وزگەرىستەر ەنگىزۋدىڭ قاجەتى جوق" دەلىنگەن حابارلامادا.
