پرەزيدەنت ق.توقايەۆ "قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا، مادەنيەت جانە مەرەكەلەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى.
وعان ساي 1 جەلتوقسان – تۇڭعىش پرەزيدەنت كۇنى مەملەكەتتىك مەرەكەلەر تىزىمىنەن الىنىپ تاستالىپ، 25 قازان رەسپۋبليكا كۇنى رەتىندە قايتادان مەرەكەلەر تىزىمىنە ەنىپ، ۇلتتىق مەرەكە ستاتۋسىن يەلەندى.
تۇڭعىش پرەزيدەنت كۇنىن مەرەكەلەر تىزىمىنەن الىپ تاستاۋ، رەسپۋبليكا كۇنىن قايتادان اتاپ ءوتۋ تۋرالى باستامانى پرەزيدەنت سايلاۋىنان كەيىن ماجىلىستەگى "جاڭا قازاقستان" فراكسياسى كوتەرگەن. كەي ساياساتتانۋشىلار ۇسىنىس الدىن الا ويلاستىرىلىپ، الداعى كەزەكتەن تىس پرەزيدەنت سايلاۋى قارساڭىنداعى توقايەۆتىڭ سايلاۋالدى كومپانياسى اياسىندا جاسالىپ وتىرعانىن ايتادى.
قاڭتار وقيعاسىنان سوڭ توقايەۆ قاۋىپسىزدىك كەڭەسىنىڭ ءتوراعاسى اتانىپ، ەكس-پرەزيدەنت نۇرسۇلتان نازاربايەۆتىڭ قولىندا دە-يۋرە بيلىك قالماعان سوڭ ەلدە بىرتىندەپ دەەلباسيزاسيا جۇرگىزىلە باستادى. الدىمەن قاڭتار وقيعاسىندا نازاربايەۆتىڭ تالدىقورعاندا قۇلاعان ەسكەرتكىشى تۇرعىزىلمادى، ارتىنشا كونستيتۋسيادان نازاربايەۆتىڭ يممۋنيتەتى الىنىپ تاستالدى. قىركۇيەكتە ەلورداعا استانا اتى قايتارىلدى.
ەلدە نازاربايەۆقا ارنالىپ تۇرعىزىلعان تاعى بىرنەشە ەسكەرتكىش بار. جوعارى وقۋ ورنى مەن مەكتەپتەر جەلىسى، ەلورداداعى اۋەجاي ءالى دە نازاربايەۆ اتىندا. رەسپۋبليكالىق ماڭىزى بار قالالار مەن وبلىس ورتالىقتارىنداعى نازاربايەۆ اتىنداعى كوشەلەر مەن داڭعىلدار دا وزگەرگەن سوڭ. توقايەۆ تۇڭعىش پرەزيدەنتتىڭ تاريحي ەڭبەگىنە قۇرمەت رەتىندە ولاردى قالدىرۋ كەرەكتىگىن ايتقان.
پىكىر قالدىرۋ