رەسەيدىڭ استراحان وبلىسىنىڭ قازاقستانمەن شەكارا بەكەتىندە موبيليزاسيالىق پۋنكت اشىلادى، دەپ جازادى رەسەيلىك كوممەرسانت باسىلىمى.
رەسەي ۇكىمەتىنىڭ حابارلاماسىن كەلتىرگەن باسىلىم شەكاراداعى وتكىزۋ پۋنكتتەرىندە ازاماتتاردى جەكە-جەكە موبيليزاسيا تىزىمىنە ەنگەن-ەنبەگەنىن تەكسەرىپ، ەنگەن جاعدايدا ارى قاراي وتكىزبەي جاتقانىن حابارلادى.
رەسەيدىڭ كورشى ەلدەرمەن شەكتەسەتىن شەكارالارىنىڭ بارلىعىندا ەلدەن شىققىسى كەلگەندەردىڭ بىرنەشە شاقىرىمعا سوزىلعان كەپتەلىسى ءالى سەيىلگەن جوق. كرەمل ازاماتتاردىڭ شەتەل اسۋىن توقتاتۋ ءۇشىن ءتۇرلى شارا قابىلداپ جاتىر.
ماسەلەن، كەشە فينليانديامەن شەكاراداعى "تورفيانوۆكا" بەكەتىندە شاقىرۋ پۋنكتى اشىلعان. گرۋزيامەن شەكارداعى "ۆەرحنيي لارس" بەكەتىندە ازاماتتار شەكارانى زاڭسىز كەسىپ وتۋگە تىرىسقان جاعدايعا دەپ وق وتكىزبەيتىن اسكەري تەحنيكا قويىلعان. سولتۇستىك وسەتيادا ءتىپتى ەلدەن شىعۋعا شەكتەپ قويىلدى.
رەسەي بيلىگى موبيليزاسياعا ەنەتىن ازاماتتاردىڭ ەلدەن شىعۋىنا بايلانىستى ناقتى ەشتەڭە ايتپاي وتىر. قورعانىس مينيسترلىگى ازاماتتار قوزعالىسىنا شەكتەۋ جوق دەسە، دۋما دەپۋتاتى ۆياچەسلاۆ ۆولودين موبيليزاسيا تۋرالى زاڭعا سايكەس، اسكەري ەسەپتە تۇرعان ازامات اسكەري كوميسساريات رۇحساتىنسىز تۇرعىلىقتى جەرىنەن شىعا المايتىنىن ايتادى.
پىكىر قالدىرۋ