"استانا" حالىقارالىق عىلىمي كەشەنى ەكونوميكالىق زەرتتەۋلەر ينستيتۋتىنىڭ باسشىسى مەيرام قاجىكەن كەزەكتەن تىس پرەزيدەنت سايلاۋىنا ءوز كانديداتۋراسى ۇسىنىلعانىن راستادى. بۇل تۋرالى قازاقپارات اگەنتتىگى حابارلادى.
"وتكەن اپتادا "امانات" قازاقستان كاسىپوداقتار دوستاستىعى" رەسپۋبليكالىق كاسىپوداقتار بىرلەستىگىندە جيىن بولىپ، كەزەكتەن تىس وتەتىن پرەزيدەنت سايلاۋىنا مەنىڭ كانديداتۋرام ۇسىنىلعان بولاتىن. ۇيىم مۇشەلەرى قولداپ داۋىس بەردى. ەرتەڭ ورتالىق سايلاۋ كوميسسياسىنا بارىپ، ۇمىتكەر رەتىندە تىركەلۋ جۇمىستارىمەن شۇعىلدانامىن" دەگەن مەيرام قاجىكەن قازاقپارات تىلشىسىنە تەلەفون ارقىلى بەرگەن سۇحباتىندا.
مەيرام زەكەش ۇلى قاجىكەن 1961 جىلدىڭ 5 ساۋىرىندە پاۆلودار وبلىسىندا تۋعان. ەكونوميكا سالاسىنداعى بىرنەشە عىلىمي ماقالالار مەن كىتاپتاردىڭ اۆتورى.
ەڭبەك جولىن تۋعان ولكەسىندە ينجەنەر-گيدروتەحنيك بولىپ باستاعان (1982 جىلى).
2002-2003 جىلدارى پاۆلودار وبلىسى ەكونوميكا دەپارتامەنتىنىڭ باستىعى، 2003-2004 جىلدارى ق ر پرەمەر-مينيسترىنىڭ كەڭسەسىندە ۇكىمەت باسشىسىنىڭ كەڭەسشىسى، ءوندىرىس جانە ينفراقۇرىلىم سالاسى ءبولىمىنىڭ مەڭگەرۋشىسى بولعان. سول تۇستا ۇكىمەتتى دانيال احمەتوۆ باسقارىپ تۇرعان. 2010-2011 جىلدارى قازاقستان يندۋستريانى دامىتۋ ينستيتۋتىنىڭ ديرەكتورى قىزمەتتەرىن اتقارعان.
بۇعان دەيىن جالپىۇلتتىق سوسيال-دەموكراتيالىق پارتياسى – نۇرلان اۋەسبايەۆتى، "اۋىل" حالىقتىق-دەموكراتيالىق پاتريوتتىق پارتياسى جيگۋلي دايرابايەۆتى كەزەكتەن تىس پرەزيدەنت سايلاۋىنا كانديدات رەتىندە ۇسىنعان بولاتىن.
پىكىر قالدىرۋ