"ديكيي ارمان" دەگەن لاقاپ اتپەن تانىمال ارمان جۇماگەلدييەۆتىڭ ۇيىمداسقان قىلمىستىق توبىنا ۇلتتىق قاۋىپسىزدىك قىزمەتىنىڭ ادامدارى قامقورلىق جاساپ كەلگەن، ال قاڭتار وقيعاسىنا ازىرلىك 2021 جىلعى جازدا باستالعان،  دەپ حابارلادى جۋرناليست ميحايل كوزاچكوۆ ۆرەميا گازەتىنە شىققان ماقالاسىندا.

جۋرناليست قولىنا تۇسكەن تەرگەۋ ماتەريالدارىنا سۇيەنىپ، ارمان جۇماگەلدييەۆكە جاپپاي ءتارتىپسىزدى ۇيىمداستىردى، زاڭسىز قارۋ ۇستادى دەگەن ايىپتان بولەك، ۇيىمداسقان قىلمىستىق توپتى (ۇقت) قۇردى دەگەن ايىپ تاعىلىپ وتىرعانىن ايتادى. ءجۋرناليستىڭ مالىمەتىنشە، ارمان جۇماگەلدييەۆ بەس جىل بويى قازاقستانداعى قىلمىس الەمىندەگى وقيعالارعا جاۋاپتى بولعان، وعان ۇقك-دە ىستەيتىن كۋراتورلارى كومەكتەسكەن.

"9 اي وتكەننەن كەيىن تەرگەۋ جۇماگەلدييەۆ ۇزاق ۋاقىت ۇلتتىق قاۋىپسىزدىك كوميتەتى بەسىنشى دەپارتامەنتىنىڭ جەتەكشىسى رۋسلان ىسقاقوۆتىڭ باقىلاۋىمەن قىزمەتىن جالعاستىرىپ كەلدى دەگەن قورىتىندىعا كەلگەن. الايدا كىم-كىمدى ءوز ماقساتىنا پايدالانعانى تولىق تۇسىنىكتى ەمەس. ءبىر ابزاستا ىسقاقوۆ ارمانعا قازاقستانداعى ترانسۇلتتىق قىلمىستىق توپتاردىڭ ەلدەگى قىلمىستىق جاعدايعا ىقپالىن جويۋ ءۇشىن سەرىكتەس بولۋعا ۇسىنىس جاساعان دەسە، ءبىر ابزاستا، ىسقاقوۆ "ءادىل جۇڭگو"، "ايشۋاق جانتۇگەل" قىلمىستىق توپتارىن ۇستاۋ بويىنشا ءىس-شارالاردى ۇيىمداستىرىپ، شپەك دەگەن لاقاپ اتقا يە رامازان عابباسوۆتى قاماۋعا اتسالىسا وتىرىپ، جۇماگەلدييەۆتى وپەراتيۆتىك ءىس-شارالاردان قورعاپ وتىرعان دەلىنەدى. دەمەك ۇقك الاڭدى ءتۇرلى ۇقت-دان تازارتىپ، ارماننىڭ توبىن اينالىپ كەتىپ وتىرعان. ال جۇماگەلدييەۆ شەندى ادامداردىڭ قامقورلىعىنا سۇيەنىپ، ايماقتارعا ءوز قاراۋشىلار قويىپ، تۇتاس قازاقستاندى نويس دەگەن لاقاپ اتى بار نۇرجان يمانالييەۆكە تاپسىرعان. يمانالييەۆ ءقازىر تۇرىك تۇرمەسىندە قاماۋدا وتىر" دەيدى جۋرناليست.

ميحايل كوزاچكوۆ قولىنداعى دەرەككە سۇيەنىپ، قاڭتار بۇلىگىنە دايىندىق 2021 جىلعى جازدا باستالدى دەيدى. 

"قىلمىستىق ءىس ماتەريالدارىندا ايتىلعانداي، "تەرگەۋ بارىسىندا انىقتالماعان ازاماتتار" بيلىكتى كۇشپەن باسىپ الۋعا كەلىسكەن. بيلىكتى قۇلاتۋ ءۇشىن ولار كەزەڭ-كەزەڭنەن تۇراتىن جوسپار دايارلاپ، ول بويىنشا بىرنەشە ايماقتا الدىمەن جاپپاي تارتىپسىزدىك ورناتۋدى كوزدەگەن. حالىقتى ۇرەيلەندىرىپ، پرەزيدەنتتى وتستاۆكاعا كەتۋ تۋرالى شەشىم قابىلداۋعا ىقپال ەتۋ ءۇشىن ءۇشىن تەررورلىق اكت جاساۋدى، ارتىنشا قىلمىس الەمىنىڭ ليدەرلەرى مەن قوعامعا بەلگىلى ادامداردان ۋاقىتشا "حالىق كەڭەسىن" قۇرىپ، وزدەرىنىڭ ادامىن پرەزيدەنت ەتىپ قويۋدى جوسپارلاعان. وسىعان بايلانىستى رۋسلان ىسقاقوۆ جاپپاي تارتىپسىزدىككە دايىن بولۋ ءۇشىن جۇماگەلدييەۆكە كۇزەت فيرماسىن تىركەپ، قارۋ مەن شىمىر جىگىتەردى جيناۋدى تاپسىرعان" دەيدى جۋرناليست.

ول ۇقك قىزمەتكەرىنەن نۇسقاۋ العان ارمان الماتىعا 17 جەلتوقسان كۇنى كەلىپ، ەشكىمگە بىلدىرمەي، وزگە ۇقت قاتىسۋشىلارىمەن كەزدەسكەنىن ايتادى. ال 5 قاڭتاردا ىسقاقوۆ جۇماگەلدييەۆكە ادام جيناپ، الاڭعا بارۋدى تاپسىرادى. ارمان ول جاقتا ءماسليحات دەپۋتاتى قايرات قۇدايبەرگەنمەن كەزدەسىپ، جاقتاستارىنىڭ ارەكەتىن ۇيىمداستىرا باستايدى. جۇماگەلدييەۆتىڭ تاپانشامەن قارۋلانعان ادامدارى قالادان 30-دان استام ادامدى ۇستاپ، ريتس كارلتون ءقوناقۇيىنىڭ پاركينگى مەن قازاقستان ءقوناقۇيىنىڭ بانكەت زالىندا كۇشتەپ ۇستاعان.

"تەرگەۋ دەرەگىنشە، ول ادامداردى كامەراعا ءتۇسىرىپ، ەسىرتكى تۇتىنعانىن، مارودەرلىك جاساپ، شەتەلگە قاشىپ كەتكەن وليگارح مۇحتار ءابليازوۆ قۇرعان قازاقستاندا تىيىم سالىنعان "قازاقستاننىڭ دەموكراتيالىق تاڭداۋى" ساياسي قوزعالىسىنىڭ مۇشەمىز دەپ ايتۋعا ماجبۇرلەگەن. ارتىنشا ىسقاقوۆتىڭ نۇسقاۋى بويىنشا ۇستالعانداردى ۇقك-گە تاپسىرعان. ارمانعا سونداي-اق اۋرۋحاناعا شابۋىل جاسادى، پوليسەيدى سوققىعا جىقتى، "قدت مۇشەسىن" ءولتىردى دەگەن ايىپ تاعىلىپ وتىر. بۇل ارەكەتتەردى رۋسلان ىسقاقوۆتىڭ بۇيرىعى بويىنشا ىستەگەن-ىستەمەگەنى بەلگىسىز" دەلىنگەن ءىس ماتەريالىندا.