قاڭتار وقيعاسى كەزىندە قيراعان رەسپۋبليكا الاڭىنداعى الماتى قالاسى اكىمى اپپاراتىنىڭ عيماراتىن جوندەۋگە جاريالانعان تەندەردى قالالىق ءماسليحات دەپۋتاتى ءامىرجان نابييەۆكە تيەسىلى كومپانيا ەش كونكۋرسسىز جەڭىپ العان. بۇل تۋرالى Shishkin_like تەلەگرام كانالى حابارلادى.

پروسەدۋرا ءبىر كوزدەن ساتىپ الۋ ءتاسىلى ارقىلى ءوتىپ، تاپسىرىس بەرۋشى قالالىق قۇرىلىس باسقارماسى مەن مەردىگەر "اتريكس-ستروي" قۇرىلىس كومپانياسى تىكەلەي كەلىسىم-شارت جاساسقان. كەلىسىم-شارت سوماسى – 10،3 ملرد تەڭگە. بۇل سوما ناقتى ەمەس، تەك جوبالىق-سمەتالىق قۇجات پەن مەملەكەتتىڭ ساراپتاما قورىتىندىسىنان كەيىن تولىق ماقۇلدانادى.

كومپانيانىڭ جيىرما جىلدان بەرگى ءبىرىنشى باسشىسى ءارى يەلەرىنىڭ ءبىرى ءامىرجان نابييەۆ الماتى ءماسليحاتىنا كىرەتىن 38 دەپۋتاتتىڭ بۇگىندە قالا باسشىلىعىمەن كەلىسىم-شارت جاساسقان التاۋىنىڭ ءبىرى. قالا بيۋدجەتىنەن ەڭ كوپ قارجى الاتىن دا وسى دەپۋتاتقا تيەسىلى كومپانيا.

ءامىرجان نابييەۆ 2013 جىلى بۇرىنعى نۇر-وتان قازىرگى امانات پارتياسىنىڭ قاتارىنا قوسىلىپ، كەلەسى جىلى-اق الماتى ءماسليحاتىنا دەپۋتات بولىپ سايلانعان. سودان بەرى ءۇش شاقىرىلىم بويى جىلى ورنىنان اۋىسقان ەمەس. وسى ارالىقتا دەپۋتاتقا تيەسىلى كومپانيا اكىمدىككە قاراستى باسقارمالارمەن جالپى جيىنتىعى 13،5 ملرد تەڭگەگە شارت جاساسقان. ال قالالىق قۇرىلىس باسقارماسىمەن 2017 جىلدان بەرى جۇمىس ىستەيدى. ورىنداعان 6 تاپسىرىستىڭ تەك ەكەۋىن اشىق كونكۋرس ارقىلى ۇتىپ العان.