ماجىلىستە سيفرلىق اكتيۆتەر سالاسىنداعى زاڭنامانى جەتىلدىرۋ ماقساتىمەن «قازاقستان رەسپۋبليكاسىنداعى سيفرلىق اكتيۆتەر تۋرالى» زاڭ جوباسى ءبىرىنشى وقىلىمدا ماقۇلداندى. جوباعا ءماجىلىس دەپۋتاتتارى باستاماشى بولدى.

وزگەرتۋلەر 4 ىلەسپە زاڭعا تىكەلەي اسەر ەتەدى. ولار: «استانا» حالىقارالىق قارجى ورتالىعى تۋرالى، سيفرلىق اكتيۆتەر تۋرالى زاڭ جوبالارى، سالىق كودەكسى جانە اكىمشىلىك قۇقىق بۇزۋشىلىق تۋرالى كودەكسى.

«اتالعان زاڭ جوبالارى سيفرلىق اكتيۆتەر نارىعىن مەملەكەتتىك رەتتەۋ جانە دامىتۋ، سيفرلىق اكتيۆتەردى شىعارۋ، ورنالاستىرۋ جانە اينالىم  پروسەسىندە تۋىندايتىن قاتىناستاردى رەتتەۋگە باعىتتالعان. سونداي-اق سيفرلىق ماينينگ ءۇشىن ينفراقۇرىلىم ۇسىنۋ قىزمەتىن ليسەنزيالاۋدى ەنگىزۋ، سيفرلىق اكتيۆتەر سالاسىنداعى زاڭ بۇزۋشىلىقتارعا اكىمشىلىك جاۋاپكەرشىلىكتەردى بەلگىلەۋ، سيفرلىق ماينينگ ءۇشىن ينفراقۇرىلىم ۇسىنۋ قىزمەتىنە سالىق سالۋدى ەنگىزۋدى قاراستىرادى»، – دەدى ءماجىلىس دەپۋتاتى عازيز قۇلاحمەتوۆ.

زاڭ جوباسى قابىلدانسا، ماينينگ فەرمالاردى قامتاماسىز ەتەتىن سەرۆيستىك قىزمەت تۇرلەرى جۇرگىزىلىپ، قاداعالانادى. ينفراقۇرىلىم رەتتەلىپ، قارجى ورتالىعى قىزمەتى جەتىلدىرىلەدى. سونىڭ اياسىندا نەگىزگى كريپتو نارىعى قالىپتاسادى. سونىمەن قاتار رەتتەۋشى مەملەكەتتىك ورگانداردىڭ ءرولى دە وسى زاڭ جوباسىندا ايقىندالادى.

نەگىزگى ماسەلە – نارىقتا «سۇر ماينەرلەردىڭ» پايدا بولۋى، ەلەكتر قۋاتىنىڭ تاپشىلىعى. ع.قۇلاحمەتوۆتىڭ ايتۋىنشا، «سۇر ماينەرلەر» شەتەلدەن اكەلەتىن قۇرال-جابدىقتاردىڭ راسىمدەلمەۋىنەن كوپ جاعدايدا ەلگە كەلىپ جاتقان تەحنيكالارعا دا سالىق سالىنباي وتىر.

جوبا اياسىندا بۇگىنگە دەيىن دەپۋتاتتاردان الپىسقا جۋىق ۇسىنىس بەرىلگەن. ولار جۇمىس توبىنىڭ، مۇددەلى مەملەكەتتىك ورگانداردىڭ، «استانا» حالىقارالىق قارجى ورتالىعىنىڭ،  «اتامەكەن» ۇلتتىق كاسىپكەرلەر پالاتاسى، قوعامدىق بىرلەستىكتەر مەن ساراپتامالىق ۇيىمدار وكىلدەرىنىڭ قاتىسۋىمەن بولعان كوميتەتتىڭ كەڭەيتىلگەن وتىرىستارىندا تالقىلاندى.

ءماجىلىستىڭ باسپا ءسوز قىزمەتى