پرەزيدەنتتىككە ۇمىتكەر 12 كانديداتتىڭ قاتارىندا ەل ءبىرشاما بىلەدى-اۋ، بۇعان دەيىن وسىنداي ىستەرىمەن كوزگە ءتۇسىپ ەدى دەيتىندەي بىردى-ەكىلى ادام بولسا، سونىڭ بىرەگەيى "اسار" رەسپۋبليكالىق قوعامدىق بىرلەستىگى اتىنان ۇسىنىلعان حايروللا عابجاليلوۆ.

كوپشىلىككە حايروللا عابجاليلوۆ ۇلتتىق ۆاليۋتا – تەڭگەنىڭ اۆتورلارىنىڭ ءبىرى رەتىندە تانىس. ال "الاش" تاريحي-عىلىمي زەرتتەۋ ورتالىعىن قۇرىپ، قازاق تاريحىن، ونىڭ ىشىندە رۋ-تايپالاردىڭ تاريحىن عىلىمي تۇرعىدا نەگىزدەپ جازۋعا كۇش سالىپ جۇرگەنىن جالپاق جۇرت بىلە بەرمەۋى مۇمكىن.

ءبىراز ۋاقىت جەكە بيزنەسىنە قول سالماق بولعاندارمەن الىسىپ، ادىلەتسىزدىككە ۇشىراعانى بار.

ول تۋرالى بەلگىلى تاريحشىلار رۋحانيات جاناشىرى دەپ جىلى ءسوز ايتادى.

ازدى-كوپتى ادام بىلەتىن، اتى بىلعانباعان، ءتۇرلى ساياسي ويىنداردا ەسىمى اتالماعان، ءتول تەڭگە اۆتورى رەتىندە، تەڭگەنى رەسەيدەن جاسىرىنىپ لوندوندا قالاي قيىندىقپەن شىعارعاندارى تۋرالى اڭگىمەلەرى ارقىلى بيوگرافياسى جۇرتقا ۇنامدى حايروللا عابجاليلوۆ كانديداتتار ىشىندە حالىققا جاقىن تۇلعا كورىنەدى. الايدا كانديداتقا قويىلاتىن زاڭ ەرەجەلەرى بار ەمەس پە ەدى...

كونستيتۋسيانىڭ ءىىى ءبولىمى 41-بابى 2-تارماعىندا قازاقستان رەسپۋبليكاسىنىڭ پرەزيدەنتى بولىپ تۋمىسىنان رەسپۋبليكا ازاماتى بولىپ تابىلاتىن رەسپۋبليكا ازاماتى عانا سايلانا الادى دەلىنگەن. ال حايروللا عابجاليلوۆ 1950 جىلى 29 ساۋىردە بۇگىنگى وزبەكستان قۇرامىنداعى اۆتونوميالىق رەسپۋبليكا قاراقالپاقستاننىڭ ءتاحتاقوپىر اۋدانىندا دۇنيەگە كەلگەن.

ورتالىق سايلاۋ كوميسسياسى كانديدات رەتىندە ۇسىنىلعان ازامات كونستيتۋسيا مەن سايلاۋ تۋرالى كونستيتۋسيالىق زاڭ نورمالارىنا سايكەس كەلەتىنىن يا كەلمەيتىنىن ءجىتى تەكسەرەتىنىن ينگا يمانباي مەن جاسارال ءقۋانىشاليندى زاڭ تالاپتارىنا ساي كەلمەيدى دەپ ۇمىتكەر رەتىندە تىركەۋدەن باس تارتقاندا كوپشىلىك كوردى.

كەڭەس وداعى تۇسىندا قازكسر-دە ەمەس، ءبىراق وداققا مۇشە رەسپۋبليكالاردا تۋعاندارعا اتالعان زاڭ نورمالارىنىڭ قاتىسى جوق پا  دەپ "ادام قۇقىقتارى حارتياسى" قوعامدىق قورىنىڭ اتقارۋشى ديرەكتورى جەمىس تۇرماعامبەتوۆاعا جۇگىندىك. ساراپشى كانديداتتاردى تىركەۋدە زاڭ تالاپتارى بۇلجىتپاي ورىندالۋى كەرەك، كانديدات تۋمىسىنان قازاقكسر نەمەسە قازاقستان ازاماتى بولۋى كەرەك، حايروللا عابجاليلوۆتىڭ ماسەلەسى بويىنشا ورتالىق سايلاۋ كوميسسياسى كونستيتۋسيالىق كەڭەسكە جۇگىنە وتىرىپ، كانديداتتىڭ تىركەلۋى تۋرالى تۇسىنىك بەرۋگە ءتيىس دەيدى.

قامشى پورتالى اتالعان ماسەلە بويىنشا ورتالىق سايلاۋ كوميسسياسىنا ساۋال جولداپ،  جاۋاپ الۋعا تىرىسادى.

تولىقتىرۋ: بۇگىن، 13 قاراشا كۇنى ورتالىق سايلاۋ كوميسسياسى تالعات ەرگالييەۆ جانە فاتيما بيزاقوۆامەن قاتار حايرۋللا عابجاليلوۆتى پرەزيدەنتتىككە كانديدات رەتىندە تىركەۋدەن باس تارتتى. كوميسسيا باس تارتۋعا اتالعان تۇلعالاردىڭ مەملەكەتتىك قىزمەتتە مىندەتتى ەڭبەك ءوتىلىنىڭ جوقتىعى نەگىز بولعانىن حابارلاعان.