قوعام بەلسەندىسى، ساياساتكەر مۇحتار تايجان وپپوزيسيا اتىنان پرەزيدەنتتىككە كانديدات ۇسىنىلماۋىنا وپپوزيسيا ەمەس، ازاماتتىق قوعامعا زاڭدىق كەدەرگىلەرمەن بارىنشا بوگەت بولاتىن اۆتوريتار جۇيە كىنالى دەگەن پىكىردە.
"وپپوزيسيا ءبىرىڭعاي ۇمىتكەردى ۇسىنۋعا جارامادى دەپ جاتقاندارعا جاۋاپ" دەگەن اتپەن Facebook-تەگى پاراقشاسىناجازبا جاريالاعان ول قوعام سۇراقتى بيلىككە قويۋى كەرەك دەپ سانايدى.
"ينگا يمانباي مەن جاسارال قۋانىشالين سىزدەر ءۇشىن وپپوزيسيالىق ساياساتكەرلەر ەمەس پە؟ ولار ءوز كانديداتۋرالارىن ۇسىندى، بيلىك ولاردى تىركەدى مە؟ جوق. بىزدە پرەزيدەنتتىك سايلاۋىنا قاتىسۋ ءۇشىن ادام مىندەتتى تۇردە مەملەكەتتىك قىزمەتتە كەمى 5 جىل جۇمىس اتقارۋ كەرەك! وعان قوسا ءوز ءوزىن ۇسىنا المايدى، تەك قانا كەمى 9 فيليالى بار رەسپۋبليكالىق قوعام ۇيىمى عانا ۇسىنا الادى. وپپوزيسيالىق ساياساتكەردى ۇسىنۋعا بۇنداي ۇيىمدى كورىپ وتىرسىزدار ما؟ مىسالى، جاسارال قۋانىشالين تابا المادى. بارلىعى قورقىپ باستارىن تارتتى. ال، ۇسىندى دەيىك، كەيىن 10 كۇن ىشىندە 120 مىڭ ادامنىڭ قولىن جيناۋ كەرەكسىڭ، ءبىر قالانىڭ ىشىندە ەمەس، قازاقستاننىڭ 2/3 رەگيونداردا. ول مۇمكىن بە؟ جوق البەتتە. قازاق تىلىنەن كوميسسياسىن ايتپاي-اق قويايىن: ونى عاني قاسىموۆ وتەدى، ال ءۋاليحان قايساروۆ وتپەيدى. بۇل شارتتار كونستيتۋسياعا ساي ەمەس، باسقا ەلدەردە بىردە ءبىر كۇن مەم قىزمەتتە ىستەمەگەن زەلەنسكيي مەن ترامپ سايلاۋعا قاتىسا الادى، ال بىزدە تەك قانا شەنەۋنىكتەرگە جول بار. سول ءۇشىن بۇل جەردە وپپوزيسياعا ەمەس، بيلىككە ايىپ ايتىڭىزدار" دەيدى ساياساتكەر.
مۇحتار تايجان ەلدە وپپوزيسيالىق پارتيا جوق ەكەنىن، ونىڭ جوق بولۋىنا دا بيلىك كىنالى ەكەنىن ايتادى.
"سوڭعى 15 جىلدا بىردە ءبىر پارتيا تىركەلگەن جوق. بۇل تۇرىمەن تىركەلمەيدى دە. سول ءۇشىن بۇل جەردە ازاماتتىق قوعامدا ەش كىناسى جوق، بار كىنا – اۆتوريتارلىق جۇيەدە عانا" دەيدى ول.
پىكىر قالدىرۋ