ورتالىق سايلاۋ كوميسسياسى حايرۋللا عابجاليلوۆ، تالعات ەرگالييەۆ جانە فاتيما بيزاقوۆانى پرەزيدەنتتىككە كانديدات رەتىندە تىركەۋدەن باس تارتتى.
كوميسسيا باس تارتۋعا اتالعان تۇلعالاردىڭ مەملەكەتتىك قىزمەتتە مىندەتتى ەڭبەك ءوتىلىنىڭ جوقتىعى نەگىز بولعانىن حابارلادى.
حايرۋللا عابجاليلوۆتى "اسار" رەسپۋبليكالىق قوعامدىق بىرلەستىگى، تالعات ەرگالييەۆتى قازاقستان قۇرىلىسشىلار وداعى، فاتيما بيزاقوۆانى "تاجىريبەلىك پسيحولوگيا" رەسپۋبليكالىق قوعامدىق بىرلەستىگى ۇسىنعان.
سونداي-اق ورتالىق سايلاۋ كوميسسياسى نۇرجان التايەۆتىڭ پرەزيدەنتتىككە كانديدات اتانۋعا سايكەستىگىن بەلگىلەۋ ءراسىمىن توقتاتتى. وعان استانا قالاسى بايقوڭىر اۋدانى سوتى التايەۆتى ۇسىنعان "مۇقالماس" بىرلەستىگىنىڭ التايەۆتى كانديدات رەتىندە ۇسىنۋ تۋرالى حاتتاماسىنىڭ قولدانىلۋىن توقتاتقانى نەگىز بولعان.
پىكىر قالدىرۋ