ورتالىق سايلاۋ كوميسسياسى الداعى پرەزيدەنت سايلاۋىنا قاتىسۋعا قۇجات تاپسىرعان 12 ازاماتتىڭ 3-ەۋى زاڭ تالاپتارىنا سايكەس كەلمەيتىنىن، ءبىر ازاماتتىڭ قۇجاتتارىن تەكسەرۋ توقتاتىلعانىن حابارلادى. ەگەر قالعان 8 ازاماتتىڭ ءبارى كانديدات رەتىندە تىركەلىپ جاتسا، بيىلعى پرەزيدەنت سايلاۋى 1991 جىلدان بەرگى ۇمىتكەر سانى كوپ بولعان سايلاۋ رەتىندە تاريحتا قالماق. ال ساپا جاعى قالاي؟ كانديداتتار پرەزيدەنت توقايەۆقا باسەكەلەس اتانا الا ما؟ ول جايلى ءتۇيىندى ەكس-پرەزيدەنت نۇرسۇلتان نازاربايەۆ تۇسىنداعى سايلاۋلارمەن سالىستىرا وتىرىپ شىعارۋدى وقىرمان ەنشىسىنە قالدىردىق.

1991 جىلعى 1 جەلتوقساندا وتكەن سايلاۋعا جالعىز كانديدات نۇرسۇلتان نازاربايەۆ ۇسىنىلىپ، 98،75 پايىز داۋىس جيناعان. سايلاۋشىلاردىڭ 1،22 پايىزى قارسى داۋىس بەرگەن.

1995 جىلى 29 ساۋىردە وتكەن جالپى حالىقتىق رەفەرەندۋم ناتيجەسى بويىنشا نۇرسۇلتان نازاربايەۆتىڭ وكىلەتتىگى 2000 جىلعا دەيىن ۇزارتىلدى.

1999 جىلعى سايلاۋعا 4 كانديدات قاتىسقان.

ساراپشىلار قازاقستان كوممۋنيستىك پارتياسىىنڭ اتىنان تۇسكەن سەرىكبولسىن ءابدىلدين پرەزيدەنت نازاربايەۆقا ىمىراسىز، تەگەۋرىندى باسەكەلەس بولعانىن ايتادى.

سايلاۋ قورىتىندىسى بويىنشا نۇرسۇلتان نازاربايەۆ 79،78 پايىز، سەرىكبولسىن ءابدىلدين 11،7 پايىز، عاني قاسىموۆ 4،61 پايىز، ەنگەلس عابباسوۆ 0،76 پايىز داۋىس جينادى. سەرىكبولسىن ءابدىلدين سايلاۋ بارىسىندا جانە داۋىس ساناۋدا كوپتەگەن زاڭبۇزۋشىلىقتار بولعانى، سايلاۋ كوميسسيالارىنىڭ ءتوراعالارى باقىلاۋشىلارعا كەدەرگى كەلتىرىپ، نازاربايەۆقا جاقتاسقانى تۋرالى مالىمدەدى. ال وبسە قازاقستان وزىنە العان مىندەتتەمەلەردى ورىنداۋدا كوپتەگەن زاڭبۇزۋشىلىقتارعا باردى، ۇساق اكىمشىلىك بۇزۋشىلىقتارعا بولا ىقتيمالدى كانديداتتاردى شەتتەتتى دەپ بۇل سايلاۋعا باقىلاۋشى جىبەرۋدەن باس تارتتى.

2005 جىلعى 4 جەلتوقساندا وتكەن پرەزيدەنت سايلاۋىندا 5 كانديدات تىركەلدى.

وعان پرەزيدەنت نۇرسۇلتان نازاربايەۆ، وپپوزيسيادان ورتاق كانديدات جارماحان تۇياقباي، ءاليحان بايمەنوۆ، ەراسىل ءابىلقاسىم، مەلس ەلەۋسىزوۆ قاتىستى. رەسمي ناتيجە بويىنشا نازاربايەۆ 91،15 پايىز داۋىسپەن جەڭىسكە جەتتى. ونىڭ باستى وپپونەنتى سانالعان جارماحان تۇياقباي 6،61 پايىز داۋىس جينادى. وزگە كانديداتتاردىڭ جيناعان داۋسى 1 پايىزدىڭ ار جاق بەر جاعىندا بولدى.

وبسە سايلاۋ پروسەسىندەگى ءبىرقاتار وڭ وزگەرىستەرگە قاراماستان، سايلاۋ بارىسى حالىقارالىق ستاندارتقا ساي كەلمەيتىنىن، وپپوزيسيالىق كانديداتتارعا ۇگىت-ناسيحات جۇمىسىن ەركىن جۇرگىزۋگە مۇمكىندىك بەرگەۋ، ولاردىڭ جاقتاستارىن قورقىتۋ سياقتى زاڭبۇزۋشىلىقتار تىركەلگەنىن حابارلادى.

2011 جىلعى 3 ساۋىردە وتكەن سايلاۋدا نازاربايەۆ 95،55 % پايىز داۋىسپەن جەڭىكە جەتتى. كانديداتتار عاني قاسىموۆ، جامبىل احمەتبەكوۆ، مەلس ەلەۋسىزوۆ 2 پايىز دا جيناي المادى.

نازاربايەۆ قاتىسقان سوڭعى سايلاۋعا وزىنەن بولەك ەكى كانديدات قاتىستى. بۇل ناۋقاندا نازاربايەۆ 97،75% داۋىس، كانديداتتار نۇرعىن سىزدىقوۆ 1،61 پايىز، ابەلعازى قۇسايىنوۆ 0،64 پايىز داۋىس جينادى.

وبسە بۇل جولى دا قوس سايلاۋ بارىسى مەن ناتيجەسىن قاتاڭ سىنادى.