تۇركىستان وبلىسىنىڭ شارۋالارى وبلىس اكىمى دارحان ساتىبالدىمەن كەزدەسە الماعان سوڭ ەرەكشە پەرفومانس جاسادى.
جەلىدە تاراعان ۆيدەودان ەر ادام ءبىر توپ شارۋاعا اكىم حان سەكىلدى بولدى، ونىڭ شىعۋىن حانعا دات ايتقانداي، تىزەرلەپ سۇرايىق دەگەن سارىندا ايتىپ جاتقانىن كورۋگە بولادى. ارتىنشا شارۋالار ءبىر كىسىدەي تىزەرلەپ "و، حان يەم" دەپ داۋىستاي باستايدى. ۆيدەو وسى جەردەن ۇزىلەدى.
جەرگىلىكتى Otyrar.kz باسىلىمىنىڭ اقپاراتىنا قاراعاندا جينالعاندارعا اكىم ءبارىبىر شىقپاعان. تەك اكىم ورىنباسارى مەن باسقارما باسشىلارى ءتۇسىندىرۋ شارالارىن جۇرگىزگەن.
باسىلىم تۇركىستان وبلىسى اكىمىنىڭ باسپا ءسوز قىزمەتى حابارلاماسىنا سۇيەنىپ، ۆيدەوداعى شاعىمدانۋشىلار شاردارا، تولە بي، جەتىساي، ماقتاارال، ورداباسى اۋداندارىنىڭ شارۋالارى ەكەنىن حابارلادى. ولار وبلىس باسشىسىنا اكىم ماقتا باعاسىن تۇتاقتاندىرۋعا ىقپال ەتسە دەگەن تىلەكپەن كەلگەن.
باسپا ءسوز قىزمەتى اكىم شارۋالارمەن 21 قىركۇيەكتە كەزدەسكەنىن، وبلىستاعى 209 ماقتا قابىلداۋ پۋنكتى مەن 22 ماقتا وڭدەۋشى زاۋىت جەكەمەنشىك بولعاندىقتان، ولاردى ءونىمدى ساتىپ الۋعا ماجبۇرلەي المايتىنىن جەتكىزگەن. ماسەلەنى شەشۋ ءۇشىن، جەرگىلىكتى اكىمدىك اۋىل شارۋاشىلىعى مينيسترلىگىنە ماقتا ءوندىرىسى ءۇشىن سۋبسيديا بولۋگە ۇسىنىس جولدادىق دەپ وتىر.
شارۋالاردى تولعاندىراتىن تاعى ءبىر ماسەلە – جەر داۋىنا بايلانىستى اكىمدىك جۇرتشىلىقتى ماسەلە جەكە قوجالىقتار اراسىندا سوت دەڭگەيىندە قارالىپ جاتقاندىقتان، جەرگىلىكتى اتقارۋشى بيلىك زاڭ بويىنشا سوت ىسىنە ارالاسا المايدى دەپ شىعارىپ سالعان.
پىكىر قالدىرۋ