بەيبىت جيىن وتكىزۋ ءتارتىبىن بۇزدى دەگەن ايىپپەن 15 تاۋلىككە قامالعان تاۋەلسىز جۋرناليست، Ne Deidi youtube جوباسىنىڭ اۆتورى دۋمان مۇحاممەدكارىمگە الەۋمەتتىك جەلىدە قولداۋ كورسەتىپ جاتقاندار سانى ءسات سايىن ارتىپ كەلەدى.
ءجۋرناليستىڭ بوستاندىعىن تالاپ ەتكەندەر اراسىندا ونىڭ ارىپتەستەرى، بەلسەندىلەر جانە قۇقىققورعاۋشىلار بار.
ءجۋرناليستى قولداۋشىلار سونداي-اق جۇرتشىلىقتى Ne Deidi youtube ارناسىنا جازىلىپ، ارنا جازىلۋشىلارىنىڭ سانىن 1 ميلليونعا جەتكىزۋگە اتسالىسۋعا شاقىرىپ جاتىر.
دۋمان مۇحاممەدكارىم كەشە كۇندىزگى ۋاقىتتا ۇيىنە الماتى وبلىسى وتەگەن باتىر اۋدانى پوليسيا باسقارماسىنىڭ قىزمەتكەرلەرى كەلىپ، شاقىرۋ قاعازىن بەرگەنىن حابارلاعان.
جۋرناليست جاريالاعان كەلەسى ۆيدەودا ادۆوكاتى عالىم نۇرپەيىسوۆ ەكەۋى پوليسيا باسقارماسىنا باراتىنىن ايتادى. عالىم نۇرپەيىسوۆ اتالعان ايىپ بويىنشا ءجۋرناليستى 15 تاۋلىككە قاماۋى مۇمكىن ەكەنىن، وسىلايشا ونى اۋزىنا قاقاپاق بولۋعا تىرىسىپ وتىرعانىن جەتكىزگەن.
كەشە كەشكە پوليسيا شاقىرۋى بويىنشا بارعان دۋمان مۇحاممەدكارىمدى الماتى وبلىسىنىڭ مامانداندىرىلعان اۋدانارالىق اكىمشىلىك سوتى اكiمشiلiك قۇقىق بۇزۋشىلىق تۋرالى كودەكستىڭ 488 بابى 7-تارماعى (بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭناماسىندا بەلگىلەنگەن ءتارتىپتى بۇزدى) بويىنشا ايىپتى دەپ تاۋىپ، 15 تاۋلىككە اكىمشىلىك قاماۋعا الۋ تۋرالى قاۋلى شىعاردى. عالىم نۇرپەيىسوۆ قاۋلىعا شاعىم تۇسىرەتىنىن ءمالىم ەتتى.
دۋمان مۇحاممەدكارىم وتكەن اپتادا ازاماتتاردى مەرزىمىنەن بۇرىن وتكەلى جاتقان پرەزيدەنت سايلاۋىنا نارازىلىق ءبىلدىرىپ، الماتىنىڭ ورتالىق الاڭىنا ميتينگكە شىعۋعا شاقىرعان.
جۋرناليست Ne Deidi youtube جوباسى ارقىلى قاڭتار وقيعاسىنىڭ قۇرباندارى، ازاپتاۋعا ۇشىراعان ازاماتتار تۋرالى اقپاراتتار، بەيبىت جيىنداردان رەپورتاجدار، ساياساتكەرلەرمەن، بەلسەندىلەرمەن سۇحباتتار جاساپ كەلەدى. بۇگىندە ارنانىڭ 130 مىڭعا جۋىق جازىلۋشىسى بار. جۋرناليست قىزمەتىن دونات جۇيەسىمەن، ياعني جازىلۋشىلارى اۋدارعان قاراجات ەسەبىنەن جۇزەگە اسىرادى. سونىڭ وتەمى رەتىندە اۋديتورياسىنا شىنايى اقپارات، بۇكپەسىز اڭگىمە ۇسىنىپ، قوعامدىق-ساياسي وقيعالار تۋرالى ۇستانىمىن اشىق جەتكىزەدى. بيلىككە بازىنا، تالاپ-تىلەك ايتام دەۋشىلەرگە دە مىنبەر بولىپ ءجۇر.
