باتىس ساراپشىلارى ۋكراينا جەرىندەگى سوعىستاعى باسىمدىق ۋكراينا جاعىنا ويىسىپ، رەسەي السىرەي باستاعانىن ايتىپ ءجۇر. الايدا بۇل سوعىستىڭ ناتيجەسى تۋرالى ايتۋعا جەتكىلىكتى مە؟ ۋكراينا جەرىن جاۋ اسكەرىنەن تولىق تازارتا الا ما، رەسەي راسىمەن جەڭىلىستىڭ از-اق الدىندا تۇر ما؟ نەمىستىڭ Deutsche Welle باسىلىمى وسى سۇراقتارعا جاۋاپ ىزدەپ، ساراپشىلاردى سوزگە تارتقان.
"ۆلاديمير پۋتين ۋكرايناعا باسىپ كىرۋدە ساتسىزدىككە ۇشىرادى. ۋكراينا جەڭىسىن جاريالاۋعا ءالى ەرتە، دەسە دە شىعىس پەن وڭتۇستىكتەگى باسىمدىق ۋكراينا جاعىندا ەكەنى انىق" دەيدى دەموكراتيالىق قورعاۋ قورى ساراپتامالىق ورتالىعىنىڭ قىزمەتكەرى برەدلي بوۋمەن.
ول رەسەي ۋكراينانىڭ ءتورت ايماعىن اننەكسيالاعانىن جاريالاعانىمەن، اتالعان ايماقتاردىڭ ءبىر بولىگىن عانا باقىلاپ وتىرعانىن اتاپ ءوتتى.
وسىعان ۇقساس پىكىردى گەرمانيانىڭ سىرتقى ساياسات قوعامىنىڭ وكىلى اندراش راچ تا ءبىلدىردى.
"ۋكراينا ءار شارشى شاقىرىمدى ازات ەتكەن سايىن، رەسەيدىڭ جالعان رەفەرەندۋمدارى مەن جالعان اننەكسياسىنا دەگەن سەنىمى تومەندەپ بارادى. ياعني، ۋكراينا ازات ەتكەن ءاربىر شارشى شاقىرىم رەسەي پوزيسياسىنىڭ تەك ۇرىس دالاسىندا عانا ەمەس، ساياسي تۇرعىدان دا السىرەي تۇسكەنىن كورسەتەدى" دەيدى ساراپشى.
ساراپشىلار ۋكراينا قارسى شابۋىلىنىڭ ءساتتى شىعۋىنا ۋكراينداردىڭ مورالدىق رۋحى، باتىس قارۋ-جاراعى، سونداي-اق رەسەيلىك قولباسشىلاردىڭ ايقىن ساتسىزدىكتەرى سەبەپ بولىپ وتىرعانىن ايتادى. پۋتين جاريالاعان موبيليزاسيا رەسەي پوزيسياسىن نىعايتۋدى كوزدەگەنىمەن، الداعى ايلاردا باسىمدىق ۋكراينا جاعىندا قالادى.
"رەسەي ارمياسى ارقا سۇيەپ وتىرعان قوسىمشا كۇش ەكى-ۇش ايدىڭ ىشىندە كەلەتىنىن ۇمىتپاۋ كەرەك. دەمەك، رەسەي الدىندا ۇلكەن پروبلەمالار تۇر، بۇنى ۋكرايندىقتار پايدالانىپ قالۋعا تىرىسادى" دەدى بەرلين عىلىم جانە ساياسات قورىنىڭ اسكەري ساراپشىسى ۆولفگانگ ريحتەر.
ول رەسەيلىك تاراپ ەندى كۇشى ايتارلىقتاي باسىم اۋە شابۋىلدارىن كۇشەيتۋى مۇمكىن دەپ سانايدى.
دەگەنمەن ساراپشىلار ۋكرايندىق قارسى شابۋىلدى اسىرا باعالاۋعا بولمايدى، قارۋلى كۇشتەر جاقىن ارادا ۋكراينانىڭ رەسەي باسىپ العان بارلىق اۋماعىن ازات ەتە الادى دەپ ايتۋ ءالى ەرتە دەيدى.
بونن ۋنيۆەرسيتەتى قاۋىپسىزدىك ماسەلەلەرى جونىندەگى ورتالىعىنىڭ قىزمەتكەرى يواحيم ۆەبەر ۋكراينادا ەڭ الدىمەن شابۋىل قارۋى، اتاپ ايتقاندا، تانكىلەر مەن جاياۋ اسكەر ماشينالارى جەتپەيتىنىنە نازار اۋداردى.
گەرمانيادا سوڭعى اپتالاردا كييەۆكە ءدال وسىنداي اسكەري تەحنيكانى جەتكىزۋ تۋرالى قىزۋ تالقى ءجۇرىپ جاتقانىمەن، بەرلين وڭ شەشىم قابىلداماعان.
"سونىمەن قاتار، ولارعا جالپى سوققى كۇشى، ءوق-دارى جانە باسقا دا زاتتار جەتپەۋى مۇمكىن. وسىلايشا ولار رەسەيلىكتەردى ازداپ شەگىندىرەدى، ءبىراق ودان كەيىن كۇز-قىس كەزەڭىندە مايدان ءبىر ورىننان قوزعالمايدى" دەپ سانايدى ساراپشى.
ۆولفگانگ ريحتەر كرەمل ارمياسىنىڭ قۋاتىن ءالى دە قاتاردان شىعارۋعا بولمايتىنىن، رەسەي اسكەرى ءالى دە قۋاتتى ەكەنىن ۇمىتپاۋ كەرەكتىگىن اتاپ ءوتتى. ول ۋكراينا رەسەي باسىپ العان بارلىق اۋماقتاردى جاقىن ارادا قايتارىپ الاتىنىنا كۇماندانادى.
"ازىرگە بۇل (رەسەي باسىپ العان بارلىق اۋماقتاردى تولىق ازات ەتۋ - رەد) – ارمان، ەلەس سياقتى. ءبىراق ۋكراينا قارۋلى كۇشتەرى حەرسون وبلىسىنا، سونداي-اق سولتۇستىك-شىعىسقا قاراي ىلگەرى جىلجي الادى دەپ ويلايمىن" دەيدى ساراپشى.
پىكىر قالدىرۋ