رەسەيدىڭ ەيسك قالاسىندا بولعان ۇشاق اپاتىنان قازا تاپقاندار سانى 13، جارالانعاندار 19 ادامعا جەتتى، دەپ حابارلادى ەلدىڭ دەنساۋلىق ساقتاۋ مينيسترلىگى.
قازا تاپقانداردىڭ دەنەسى اپات ورنىنداعى قيراندى استىنان تابىلعان. 68 ادام قۇتقارىلىپ، 360 ادام ەۆاكۋاسيالانعان.
كەشە رەسەيدىڭ كراسنودار ايماعى ەيسك قالاسىندا بومبالاۋشى سۋ-34 ۇشاعى اپاتقا ۇشىراپ، توعىز قاباتتى ۇيگە قۇلاعان. ۇشقىش كاتاپۋلت ارقىلى سەكىرىپ ۇلگەرگەن. اپات ورنىندا كەمى 4 قاباتتى شارپىعان ءورت بولعان.
اسكەري ۆەدومستۆو ۇشاق اۋەگە جاتتىعۋ ورىنداۋ ماقساتىندا كوتەرىلگەنىن حابارلادى.
ۆۆس مالىمەتىنشە، سۋ-34 سۋ-27 ۇلگىسىنىڭ جاڭارتىلعان نۇسقاسى، 2014 جىلدان بەرى قولدانىلىپ كەلە جاتقان رەسەيلىك بومبالاۋشى ۇشاقتاردىڭ نەگىزگىلەرىنىڭ ءبىرى. اتتالعان ۇشاق ۋكرايناداعى سوعىستا دا قولدانىلىپ جاتىر.
پىكىر قالدىرۋ