استانانىڭ بايقوڭىر اۋداندىق سوتى نۇرجان التايەۆتى پرەزيدەنتتىككە كانديدات رەتىندە ۇسىنعان "مۇقالماس" رەسپۋبليكالىق قوعامدىق بىرلەستىگىنىڭ قاۋلىسىن زاڭسىز دەپ تاپتى.

"بىرلەستىك مۇشەلەرىنىڭ جالپى جيىنىندا كوپشىلىك كەزەكتەن تىس پرەزيدەنت سايلاۋىنا كانديدات رەتىندە التايەۆتى ۇسىنۋعا قارسى داۋىس بەرگەن" دەلىنگەن سوت باسپا ءسوز قىزمەتى حابارلاماسىندا.

حابارلامادا، التايەۆتى 6 ادام قولداپ، 11 ادام قارسى داۋىس بەرگەنى، داۋىس بەرگەن كەي ادامدار بىرلەستىك مۇشەسى بولماعاندىقتان داۋىس بەرۋگە دە قۇقىعى بولماعانى ايتىلادى. ال التايەۆ كانديداتۋراسىن ۇسىنۋ ماسەلەسى قوزعالعان "مۇقالماس"-تىڭ جيىنىندا ءوزىن 28 ادام قولداعانىن، 13 ادام قارسى شىققانىن جەتكىزگەن.

نۇرجان التايەۆ ورتالىق سايلاۋ كوميسسياسىنا قۇجاتتارىن 7 قازاندا وتكىزگەن. ارتىنشا ونى ۇسىنعان "مۇقالماس" رەسپۋبليكالىق قوعامدىق بىرلەستىگىنىڭ كەي مۇشەلەرى قاۋلىعا قارسىلىق رەتىندە سوتقا ارىز ءتۇسىرىپ، وسك التايەۆ قۇجاتتارىنىڭ زاڭ نورمالارىنا سايكەستىگىن تەكسەرۋدى توقتاتقان.

ساياساتكەر الدىنان شىققان كەدەرگىلەر بيلىكتىڭ ۇيىمداستىرۋىمەن ادەيى جاسالعان دەپ سانايدى.

ول 2020 جىلى ءماجىلىس دەپۋتاتى رەتىندەگى وكىلەتتىگىن توقتاتىپ، "ەل تىرەگى" دەگەن اتپەن پارتيا قۇراتىنىن ءمالىم ەتكەن. سودان بەرى ءوزىن وپپوزيسيا قاتارىنا جاتقىزادى. بىرنەشە رەت رۇحسات ەتىلگەن ميتينگ وتكىزىپ، پارتيا جاقتاستارى اكىمشىلىك جاۋاپكەرشىلىككە تارتىلىپ، اباقتىعا قامالعانى بار. الايدا  "ەل تىرەگى" بەلسەندىلەرىنىڭ بيلىككە سىنى، تىركەلمەگەن وزگە پارتيا بەلسەندىلەرىمەن سالىستىرعاندا جۇمساقتاۋ. پارتيانى تىركەۋ بويىنشا بىرنەشە ارەكەتى ءساتسىز اياقتالعان. ادىلەت مينيسترلىگى "ەل تىرەگىنىڭ" قۇجاتتارىندا شيكىلىپ بار دەسە، بەلسەندىلەر مۇنى بيلىكتىڭ جاڭا ساياسي كۇشتى ساياسات ساحناسىنا شىعارماۋعا تىرىسۋى دەپ باعالايدى.