رەسەي استاناسى ماسكەۋدە ۋكرايناعا قارسى سوعىسقا بايلانىستى جاريالانعان ءىشىنارا موبيليزاسيا اياقتالدى. بۇل تۋرالى قالا مەرى سەرگەي سوبيانين حابارلادى.
اكىمدىك سايتىندا جاريالانعان حابارلامادا ماسكەۋدە موبيليزاسياعا قاتىستى بارلىق تاپسىرما تولىق ورىندالعانى جازىلعان. موبيليزاسيالانعان ادامداردى قابىلداۋ پۋنكتتەرى بۇگىن ماسكەۋ ۋاقىتىمەن ساعات 14:00-دە جابىلىپ، بۇعان دەيىنگى شاقىرتۋ قاعازدارى ءوز كۇشىن جوياتىنى ايتىلدى.
ماسكەۋ مەرى موبيليزاسيالانعانداردىڭ ناقتى سانىن جاريالامادى.
بىرنەشە كۇن بۇرىن قالاداعى جاتاقحانالار مەن مەترو ستانسيالارىندا پوليسيا وكىلدەرى شاقىرۋ قاعازىن تاراتىپ جۇرگەنى تۋرالى اقپارات تاراعان. ءبىراق ماسكەۋ اسكەري كوميسسارى اقپاراتتى جوققا شىعاردى.
پۋتين رەسەيدەگى ءىشىنارا موبيليزاسيا جۇمىستارىن الداعى 2 اپتا ىشىندە تولىق اياقتاۋ جونىندە تاپسىرما بەرگەن.
پىكىر قالدىرۋ