بەلگىلى اقىن، جىرشى قايرات قۇلمۇحاممەد حالىقارالىق TURKSOY ۇيىمىنىڭ Mabtumkulu FIRAKI اتىنداعى سىيلىقتىڭ يەسى اتاندى. 

ماراپات اقىنعا رەسمي تۇردە سالتاناتتى جاعدايدا تابىستالدى.

قايرات قۇلمۇحاممەد 1966 جىلى 21 تامىزدا قىتايدىڭ شىنجاڭ اۆتونومياسىنا قاراستى جەمەنەي اۋدانىندا دۇنيەگە كەلگەن. تۋعان جەرىندە ورتا ءبىلىم العان ول 1990 جىلى شىنجاڭ كونسەرۆاتورياسىندا مادەنيەت سالاسىن باسقارۋ ماماندىعىن يگەرىپ، 1992 جىلى شىنجاڭ ۋنيۆەرسيتەتىنىڭ فيلولوگيا فاكۋلتەتىن ءتامامداعان.

1985 جىلى 19 جاسىندا ايتىس ساحناسىنا شىققان ول 1999 جىلى جۇڭگو قازاقتارىنىڭ باس ايتىس اقىنى اتاعىنا يە بولدى. جازبا اقىندىق پەن ەجەلگى جىراۋلىق ءداستۇردى ۇستانىپ، سول ەلدەگى ەكى ميلليون قانداستارىمىز ورتاسىندا عانا ەمەس، سونىمەن بىرگە قازاقستان حالقىنا دا ءوز ەسىمىن كەڭىنەن تانىتىپ ۇلگەردى.

1998 جىلدىڭ ءساۋىر ايىندا "قىتايدىڭ وسى زامانعى ايگىلى كوركەم ونەرشىسى" دەگەن مەملەكەتتىك سىيلىعىن الدى. 1999 جىلى جەلتوقساندا امەريكا قۇراما شتاتتارىندا
بەلگىلەنگەن "الەمنىڭ ايگىلى ادامى" دەگەن ماراپاتتى اتاققا يە بولعان. 2003 جىلدىڭ قاڭتار ايىندا وزبەكستاننىڭ تاشكەنت قالاسىندا وتكەن حالىقارالىق اقىندار ايتىسىندا باس بايگەنى جەڭىپ العان. 2003 جىلدىڭ مامىر ايىندا رەسەيدىڭ ومبى قالاسىنا ونەر ساپارىمەن بارىپ، رەسەي دۋماسىنىڭ دەپۋتاتى ولەگ ءسموليننىڭ قولىنان ءىحالىقتار دوستىعىنىڭ ۇزدىك جىرشىسى" دەگەن العىس حاتپەن ماراپاتتالدى. 2003 جىلعى شىلدە ايىندا موڭعوليانىڭ بايان-ولگيي ايماعىندا وتكەن اقىندار ايتىسىندا باس جۇلدەگەر بولدى.

2005 جىلدىڭ شىلدە، تامىز ايلارىندا تۇركياعا ارنايى شاقىرۋمەن بارىپ، ول ەلدەن ەكى ماراپاتتاۋ ديپلومىمەن ورالدى. 2007 جىلعى مامىر ايىندا گەرمانيانىڭ ميۋنحەن قالاسىندا وتكەن ەۋروپا قازاقتارىنىڭ كىشى قۇرىلتايىندا ورىنداعان تاماشا تولعاۋى ءۇشىن ول ەلدەن دە العىس حات الىپ قايتتى.

قايرات قۇلمۇحاممەد ۇلىنىڭ 1991 جىلعى قازاقستانعا العاش ساپارلاي كەلگەندە ورىنداعان "سالەمدەمە" تولعاۋى ونىڭ اقىندىق اتاعىن ءتىپتى دە اسپانداتا ءتۇستى. 1998 جىلى سەمەي قالاسىندا وتكەن شاكارىم قۇدايبەردى ۇلىنىڭ 140 جىلدىق مەرەيتويىنا ارنالعان اقىندار ايتىسىندا باس جۇلدەنى ەنشىلەدى. 

2002 جىلى تۇركىستاندا، 2005 جانە 2011 جىلدارى استانادا وتكەن دۇنيەجۇزى قازاقتارىنىڭ ءىى، ءىىى، ءىV قۇرىلتايلارىندا جازبا اقىنداردىڭ جىر ءمۇشايراسىندا ايرىقشا كوزگە ءتۇسىپ جۇلدەگە يە بولسا، 2003 جىلى ءساۋىر ايىندا استانادا بەس مەملەكەتتىڭ اقىندارى قاتىسقان حالىقارالىق ايتىستا بيىك تالانتىمەن جۇرتتى تاڭ قالدىردى.

2001 جىلى تامىز ايىندا قىتايدان قازاقستانعا كوشىپ كەلىپ، الماتى قالاسىنا قونىستانعان ول ەلىمىزدەگى حالىقتىق سيپات العان بارلىق مادەني-الەۋمەتتىك شارالارعا بەلسەنە ارالاسىپ كەلەدى.