2021 جىلى مارات نۇراجى مەن ايگۇل نۇراجى ەسىمدى اعايىندىلار نيۋ-يورك قالاسىنىڭ قازاقتارىن قولداۋ ماقساتىندا ارنايى «KCSG» اتتى قور اشقان. مارات نۇراجى اتالعان قوردى اشۋعا نە سەبەپ بولعانىن جانە الداعى ماقساتى جونىندە ايتىپ بەردى.

«ءوزىم امەريكالىق قازاق بولعاسىن، قازاق بالالارىن قورعاۋدى ماقسات ەتتىم. سول سەبەپتى قازاق بالالارىن قورعاۋ ۇيىمىن اشۋدى قولعا الدىم. 2021 جىلدىڭ 11 شىلدەسىندە «Marine» اتتى پاركتە قور قۇرۋ ءۇشىن قايىرىمدىلىق شاراسىن وتكىزىپ، قاراجات جيناي باستادىق. ءىش-شاراعا نيۋ-يورك قالاسىنىڭ قازاقتارى كوپتەپ كەلگەنىن بايقادىم. بۇل مەنى تىپتەن جىگەرلەندىرە ءتۇستى. ءسويتىپ، قوردىڭ جۇمىسىن دامىتۋعا بىلەك سىبانا كىرىسىپ كەتتىك»، دەيدى مارات نۇراجى.

مارات پەن ايگۇلدىڭ اكەسى نۇرشات نۇراجى استانا قالاسىنداعى نازاربايەۆ ۋنيۆەرسيتەتىندە پروفەسسور بولىپ قىزمەت اتقارادى. ول دا بىرنەشە جىل بۇرىن نيۋ-يورك قالاسىندا ءبىلىم الىپ، پروفەسسور دارەجەسىن قورعاعان.

«ءبىز نازاربايەۆ ۋنيۆەرسيتەتىندەگى «بالالاردى دامىتۋ» ۇيىمىمەن تىعىز بايلانىس قۇرىپ، بىرلەسىپ جۇمىس ىستەۋدى جوسپارلادىق. 2022 جىلدىڭ كوكتەمىنەن باستاپ سول ۇيىممەن بىرگە الەۋمەتتىك جاعدايى تومەن قازاق بالالارىنا ءبىلىم بەرىپ، كومەك كورسەتە باستادىق. بيىلعى جىلدىڭ اقپان ايىندا ZOOM ارقىلى قازاقستاندىق بالالارعا اعىلشىن تىلىنەن ساباق بەردىك»، دەيدى قور وكىلى.

اعايىندى نۇراجىلار 25 ماۋسىمدا قازاقستانعا قوناققا كەلدى. بۇل – نيۋ-يورك قالاسىندا دۇنيەگە كەلگەن اعايىندىلاردىڭ قازاقستانعا جاساعان العاشقى ساپارى.

«بۇعان دەيىن ونلاين تۇردە ساباق بەرگەن ەدىك. قازاقستانعا كەلگەن كەزدە وقۋشىلارىمىزبەن كەزدەسىپ، وفلاين تۇردە ساباق بەرۋ باقىتى بۇيىردى. وقۋشىلارىمىزدى قىزىقتىرعان سۇراقتارعا جاۋاپ بەرىپ، شەتەلدەگى مەكتەپتەر مەن ۋنيۆەرسيتەت تۋرالى ايتىپ بەردىك. ولار نازاربايەۆ ۋنيۆەرسيەتىنە بۇرىن بارىپ كورمەگەن ەكەن. ءبىز بالالاردى ەرتىپ، ۋنيۆەرسيتەتتى بىرگە ارالادىق»، دەيدى مارات نۇراجى.

بۇدان كەيىن دە مارات نۇراجى مەن ايگۇل نۇراجى قوردىڭ جۇمىسىن جانداندىرىپ، قازاق بالالارىنا ءبىلىم بەرۋدى جالعاستىرا بەرمەك.