ورتالىق سايلاۋ كوميسسياسىنىڭ قاۋلىسىنا ساي، قازاقستان حالىق پارتياسى اتىنان سايلانعان ءماجىلىس دەپۋتاتى ايبەك پايايەۆتىڭ وكىلەتى توقتاتىلدى.
قاۋلىدا وكىلەت پايايەۆتىڭ ءوتىنىشى بويىنشا توقتاتىلعانى ايتىلادى.
الايدا جەلىدە مۇنى ەكس-دەپۋتاتتىڭ ءبىر اي بۇرىن رەسەيلىكتەر شەكارانى زاڭسىز كەسىپ ءوتىپ جاتقاندا ايتقان "زاڭ بۇزعان شەتەلدىك ازاماتتاردى بىردەن دەپورتاسيالاۋ كەرەك" دەگەن مالىمدەمەسىمەن بايلانىستىرىپ جاتقاندار بار.
"كەتتى ەمەس، كەتىردى، جازدى ەمەس، جازعىزدى" دەيدى كوپشىلىك جۇرت.
باي-باقۋاتتى ادامداردى، بيلىكتەگى شەنەۋنىكتەردى "باقىتتى ادام" دەپ ەسەپتەيتىن ءازىل-شىنى ارالاس جازبالارىمەن بەلگىلى ساياساتتانۋشى سامات نۇرتازا ماسەلەگە بايلانىستى "ءار ادام ءوز باقىتىنى/سورىنىڭ اۆتورى دەپ بەكەر ايتپايدى" دەپ مالىمدەمە پايايەۆتىڭ جىلى ورنىن بوساتۋىنا سەبەپ بولدى دەگەنگە مەڭزەيدى.
ەكس-دەپۋتاتتىڭ ءوزى جاعدايدى وتباسىلىق ماسەلەرگە بايلانىستى قازاقستان حالىق پارتياسى قاتارىنان شىققانىن، پارتيادان شىققاندا ماجىلىستەگى وكىلەت اۆتوماتتى تۇردە توقتاتىلاتىنىن ايتىپ تۇسىندىرگەن. بولاشاقتا مەملەكەتتىك قىزمەتكە ورالۋعا، دەپۋتات بولۋعا قارسى ەمەستىگىن دە اتاپ وتكەن.
وسى جەردە جوعارىدا ايتقان ساياساتتانۋشى سامات نۇرتازانىڭ "بيلىكتى ادەتتە مەملەكەتتىك قىزمەتتە ىستەۋدى جوسپارلامايتىندار، مەمقىزمەتتەن كۇدەرى ۇزىلگەندەر ءجيى سىنايدى، ال مەمقىزمەتتە ىستەپ قالۋى ىقتيمال ادامدار الەۋمەتتىك جەلىدە ءتىلىن تىستەپ جۇرەدى" دەگەنگە ساياتىن ءسوزى ەسكە تۇسەدى.
پىكىر قالدىرۋ