ءقازىر الەم اشىق اقپارات مايدانىنا كوشكەندىكتەن، مادەنيەتتەر مەن وركەنيەتتەر «قاقتىعىسى» كۇن سايىن سانانى سىنالاپ جاۋلاۋدا. بۇل اسىرەسە ادامداردىڭ سەنىمىنە شابۋىلداپ، رۋحانياتىن لايلاپ ۇلگەرگەنىن ەلىمىزدەگى جات ءدىني اعىمداردىڭ لاڭىنان بەلگىلى تاجىريبەگە اينالدى. وسى ورايدا ءدىني سالا قىزمەتكەرلەرىنىڭ جات اعىمداردى اۋىزدىقتاۋعا پارمەنى قانشالىقتى دەگەن ساۋال تۋىندايدى. سوندىقتان ەلىمىزدەگى جالعىز يسلامي جوعارى ءبىلىم ورداسى نۇر-مۇباراك ۋنيۆەرسيتەتى جانىنان «ەكسترەميزمنىڭ الدىن الۋعا بايلانىستى مامانداردى قايتا دايارلاۋ ينستيتۋتى» بولىپ اشىلعان ورتالىق جاقىندا «ءدىني ەكسترەميزمگە قارسى ءىس-قيمىل اكادەمياسى» بولىپ قايتا قۇرىلعان. اكادەميا ءدىني وڭالتۋ جانە ەكسرەميزمگە قارسى سالا بويىنشا نەگىزگى ارىپتەستەر قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگىنىڭ  ءدىن ىستەرى كوميتەتى، اكىمدىكتەر، ايماقتىق ءدىني زەرتتەۋ ورتالىقتارى جانە قازاقستان مۇسىلماندارى ءدىني باسقارماسى ەكەنىن ايتادى.  

وسى اپتادا قمدب ماماندارىنا ارنالعان «ءدىني وڭالتۋ جۇمىستارىن جۇرگىزۋدىڭ ءتيىمدى تاسىلدەرى» اتتى كۋرس باستالدى. 

"ەكسترەميزمنىڭ الدىن الۋ باعىتتارى بويىنشا بىزدە تۇراقتى جوبالار، كۋرستار جىل بويى جالعاسىپ وتىرادى. سونىڭ بىرەگەيى ق ر اقدم ءدىن ىستەرى كوميتەتىمەن ءۇشىنشى جىل قاتارىنان «يسلامدىق باعىتتاعى دەسترۋكتيۆتى جانە راديكالدى ءدىني يدەولوگيانى ۇستانۋشىلاردى راديكالدى كوزقاراستان ارىلتۋ جانە وڭالتۋ سالاسىنداعى مامانداردىڭ بىلىكتىلىگىن ارتتىرۋ» اتتى كۋرس وتە جوعارى دەڭگەيدە ءوتتى. سوڭعى رەت ەلىمىزدىڭ تۇكپىر-تۇكپىرىنەن ءدىني سالاعا تىكەلەي قاتىسى بار 73 مامان، ياعني تەولوگتار، يسلامتانۋشىلار، يمامدار، ءدىنتانۋشىلار جان-جاقتى بىلىمدەرىن جەتىلدىردى. ال ءقازىر قازاقستان مۇسىلماندارى ءدىني باسقارماسىنىڭ ماماندارى بىلىكتىلىگىن ارتتىرۋ ۇستىندە"، – دەدى اكادەميا ديرەكتورى، تەولوگ تيمۋر ءنۇسىپحان ۇلى:

سونداي-اق سوڭعى 2 جىلدا قمدب، ايماقتىق جانە قالالارداعى ءدىن ىستەرى باسقارمالارى، ولارعا قاراستى ورتالىقتار، جالپى 700-دەن اسا مامان قامتىعان 9 كۋرس ۇيىمداستىرىلعان. «جۋسان» گۋمانيتارلىق وپەراسياسىمەن قايتارىلعان جانە دەسترۋكتيۆتى ءدىني اعىم جەتەگىندەگىلەردى وڭالتۋ ماقساتىندا ەلىمىزدىڭ ءار ايماعىنان 200-دەي ادامعا كۋرستار وتكەن. تەك بۇل باعىتتا عانا ەمەس، ب ا ق، الەۋمەتتىك جەلىلەردە دەسترۋكتيۆتى ساناعا ناسيحاتتاۋشى شەتەلدىك ۋاعىزشىلاردىڭ 15 بەينەجازباسىنا ساراپتاما جاسالىپ، ناقتى جاۋاپ بەرىلدى. رەسپۋبليكالىق «جەتىسۋ» تەلەارناسىمەن بىرلەسكەن «بۇگىنگى ءدىن» تەلەحابارىندا ۇلتتىق قۇندىلىقتارىمىزدى دارىپتەۋ، دەراديكاليزاسيا بويىنشا وزەكتى تاقىرىپتارعا 22 حابار كورەرمەنگە ۇسىنىلعان. دەمەك ەلىمىزدەگى ءدىني تۇراقتىلىق جولىندا بىلىكتىلىگى مىعىم ماماندار ارتىپ قانا قويماي، ەلدىڭ ءدىني ساۋاتى دا كوتەرىلىپ كەلەدى دەگەن سەنىمدەمىز.

نۇر مۇباراك ەگيپەت يسلام مادەنيەتى
ۋنيۆەرسيتەتىنىڭ باسپا ءسوز قىزمەتى