بۇگىندە ەكى ءۇيدىڭ ءبىرىنىڭ بالاسى ءتۇرلى-تۇستى كيىمدەگى چيكي، چا-چا، بۋم-بۋم، لياليا اتتى كەيىپكەرلەردى بىلەدى دەسەك، ارتىق ايتقاندىق بولماس. ولاردىڭ ىرعاقتى اندەرىنىڭ قارالىمى بىرنەشە ميللياردتان اسىپ كەتكەن. كوڭىلدى تورتتىكتەگى كەي جىگىتتەردىڭ ءجۇزى اسىرەسە قازاق اۋديتورياسىنا تانىس سياقتى كورىنۋى مۇمكىن. ويتكەنى بالالار كونتەنتىمەن الەمدى باعىندىرىپ جاتقان شىعارماشىلىق ۇجىم قىرعىز ەلىنىڭ وكىلدەرى. 28 قازان – حالىقارالىق انيماسيا كۇنىندە ميلليونداعان بالدىرعان كۇندە كورەتىن كوڭىلدى ۆيدەولاردىڭ اۆتورى D Billions كومانداسى تۋرالى اقپارات ۇسىنامىز.
D Billions – بالالار اندەرىن ورىندايتىن مۋزىكالىق توپ. كوماندانىڭ نەگىزىن سالۋشى ەرنيس ۇمەتالييەۆ ەسىمدى قىرعىز مۋزىكانتى. مۋزىكالىق توپتىڭ قىرعىز، اعىلشىن، ورىس، يسپان، فرانسۋز، پورتۋگال، اراب، يندونەزيا سياقتى سەگىز تىلدە كونتەنت تاراتاتىن ون YouTube ارناسى بار. نەگىزگى D Billions دەپ اتالاتىن ارنانىڭ جازىلۋشىلارى بۇگىندە 22 ميلليونعا تاياپ قالعان. ال كانالداعى جالپى قارالىم 25 ميللياردقا جۋىقتايدى.
D Billions بريلليانت باتىرماعا يە ورتا ازياداعى جالعىز Youtube كانال. ال ۆيدەولارداعى اندەر Spotify، Amazon، iTunes، Apple Music، Deezer، Yandex، مۋزىكا، ۆكونتاكتە سەكىلدى ءان ساتىپ الۋ پلاتفورمالارىنا جۇكتەلىپ وتىرادى.
D Billions جاس كورەرمەندى اندەرىندەگى كوڭىلدى موتيۆپەن، بالالار اۋديتورياسىنا بەيىمدەلگەن قاراپايىم ماتىندەرمەن جاۋلاپ الدى. كەيىپكەرلەرى الفاۆيت ارىپتەرى تۋرالى ايتادى، اعىلشىن سوزدەرىن ۇيرەتەدى، بۇلدىرشىندەرگە قايتالاۋ وڭاي بي قيمىلدارىن كورسەتەدى. كەيىپكەرلەردىڭ وبرازى جارقىن، ءتۇس ۇيلەسىمىنە، ءتۇستىڭ ۆيزۋال ىقپالىنا قاتتى ءمان بەرىلگەن.
توپ تانىمالدىققا يە بولا باستاعاندا ولاردىڭ كىم ەكەنىن بىلگىسى كەلەتىندەر سانى كوبەيدى. ولاردىڭ ءبىرى فيليپيندىكتەرگە، ءبىرى قىتايلارعا، ەندى ءبىرى ورتا ازيالىقتارعا ۇقساتىپ جاتتى.
تەك 2021 جىلدىڭ اقپانىندا ارناعا قىرعىز تىلىندە بىرنەشە بەينەروليكتەر شىعارىلعاننان كەيىن D Billions قاتىسۋشىلارى جاس قىرعىزستاندىقتار ەكەنى تۋرالى اقپارات شىقتى.
توپ قۇرامى چيكي (Chicks)، چا-چا (Cha-Cha)، بۋم-بۋم (Boom-Boom) جانە لياليا (LyaLya) بۇركەنشىك اتتارىمەن ونەر كورسەتەتىن 4 ادامنان تۇرادى. چيكي ەسىمدى سارىشاشتى كەيىپكەر الەۋمەتتىك جەلىدە Saree Shake دەگەن نيكپەن بەلگىلى. ۆيدەولاردى الەۋمەتتىك جەلىدە ىلگەرىلەتۋمەن اينالىسادى. چا-چا دەپ اتالاتىن كوك شاشتى كەيىپكەردىڭ ءرولىن تانىمال قىرعىز مۋزىكانتى اسكو انارقۇلوۆ وينايدى. قىزىل شاشتى بۋم-بۋمنىڭ ءرولىن Johnny دەگەن ساحنالىق ەسىممەن تانىمال تاعى ءبىر مۋزىكانت جانىبەك جەڭىسبەكوۆ سومدايدى. ءليليدىڭ رولىندەگى اكتەر قىزدىڭ ەسىمى دارينا ۆەكۋا.
كوماندانىڭ نەگىزىن سالۋشى 15 جىلدان استام ۋاقىت قىرعىز شوۋ بيزنەسىندە ەڭبەك ەتكەن مۋزىكانت ەرنيس ۇمەتالييەۆ. ول ءۆۆس-دىڭ قىرعىز قىزمەتىنە بەرگەن سۇحباتىندا ەلدە شوۋ بيزنەسكە قاراعاندا، توي بيزنەس كەڭ ەتەك جايعانىن، تويدان شارشاپ، باسقا نارسەمەن اينالىسقىسى كەلگەنىن ايتادى. ونەر ارقىلى قىرعىزستان اتىن شىعارۋدى ارمانداعانىن اتاپ وتەدى. ءسويتىپ جۇرگەندە قىرعىز ەلىندە Youtube كوپ قارالا باستاپ، سول جاقتا باعىن سىناپ كورگەن. الايدا Youtube-تا اۆتورلىق كونتەنتتەر عانا شىعاتىندىقتان، ءارى سولارعا عانا اقشا تولەنەتىندىكتەن، شىعارماشىلىق ۇجىمعا كوپ ىزدەنۋگە تۋرا كەلگەن. اقىرى بالالار كونتەنتىنە كەلىپ توقتاپ، بىرتىندەپ ۆيدەو ءتۇسىرىپ، تاراتا باستاعان. العاشقىدا الەۋمەتتىك جەلى زاڭدىلىقتارىن بىلمەگەندىكتەن Youtube ۆيدەولاردى بۇعاتتاپ، ءوشىرىپ تاستاپ وتىرعان. ىزدەنىپ، ستراتەگيا قۇرىپ، ماركەتينگ جاساپ، ۆيدەولاردى تاراتۋ تاسىلدەرىن مەڭگەرگەن سوڭ بالالار كونتەنتى ءوز اۋديتورياسىن تاپقان.
ەرنيس ۇمەتالييەۆ D Billions-تىڭ جەتىستىك سىرىن بىلىكتى كوماندامەن بايلانىستىرادى. ۆيدەودا ءتورت كەيىپكەر عانا كورىنگەنىمەن، ونىڭ ارتىندا تۇتاس ۇجىم ەڭبەگى جاتىر. دايىن ۆيدەو جيىرما كۇنگە سوزىلاتىن ۇلكەن پروسەستەن تۇرادى. الدىمەن ءان جازىلىپ، سوعان سەناريي قۇرىلادى. كەلەسى كەزەڭدە ونىممەن قويۋشى رەجيسسەرلەر جۇمىس ىستەپ، انيماسيا بولىمىنە تاپسىرادى. انيماسيا دايىن بولعان سوڭ، قايتادان دىبىس جازىلادى. وسىلايشا ايىنا 15-20 روليك دايىندالادى. كوماندا سانعا ەمەس، ساپاعا جۇمىس ىستەگەن دۇرىس دەيدى. ترەند سوڭىنان قۋعانشا، ءوزىڭ ترەند بولاتىن دۇنيە جاسا دەگەن دە ەرنيس ۇمەتالييەۆ ۇستانعان باس قاعيدالاردىڭ ءبىرى.
ەرنيس ۇمەتالييەۆ روليكتەردى جاساۋدا الەۋمەتتىك جاۋاپكەرشىلىكتى ەسكەرە وتىرىپ ۆيدەو بالا ءۇشىن تانىمدىق بولۋىنا باسا ءمان بەرەتىنىن ايتادى. بۇل تالپىنىس ءساتسىز ەمەس. ميلليونداعان بالانىڭ انا-اناسى ءبۇلدىرشىنى سانداردى، ارىپتەردى، اعىلشىن سوزدەرىن ۇيرەنىپ جاتقانىن كومەنتارييگە جازىپ، جىلى پىكىرلەرىن قالدىرعان.
كوماندا قىرعىز ەلەمەنتتەرى بار ۆيدەولاردى اعىلشىن تىلىندە ۇسىنىپ، سول ارقىلى ەل يميدجىنە وڭ ىقپال ەتۋدى دە جوسپارلايدى.
D Billions مۇنىمەن توقتاپ قالماي، الداعى ۋاقىتتا 50 ميلليون، 100 ميلليون جازىلۋشىلارعا قول جەتكىزۋگە نيەتتى.
پىكىر قالدىرۋ