12 قازاندا الماتى قالاسىنداعى رەسپۋبليكالىق دوستىق ۇيىندە قازاقستاننىڭ ايەلدەر كۇشتەرى اليانسىنىڭ ساياساتكەر ايەلدەر كلۋبى مەن ايەلدەردىڭ ساياسي كوشباسشىلىعى مەكتەبىنىڭ تانىستىرىلىمى ءوتتى.

بۇگىنگى تاڭدا قازاقستان رەسپۋبليكاسى پارلامەنتى سەناتىندا 49 دەپۋتاتتىڭ 10-ى ايەل دەپۋتات، ياعني 20% قۇرايدى، ماجىلىستەگى ايەلدەردىڭ سانى 24% – 107 دەپۋتاتتىڭ 26-سى ايەل. 16 ءمينيستردىڭ ىشىندە قازاقستان رەسپۋبليكاسىنىڭ ورتالىق اتقارۋشى ورگاندارىن تەك 2 ايەل باسقارادى. تولىق جانە ءتيىمدى قاتىسۋدى جانە ايەلدەردىڭ تەڭ مۇمكىندىكتەرىن قامتاماسىز ەتۋ ءۇشىن شەشىم قابىلداۋ دەڭگەيىندە ايەلدەردىڭ قاتىسۋىن 30%-عا دەيىن ارتتىرۋ قاجەت. ايەلدەردىڭ ساياسي ومىرگە جانە شەشىم قابىلداۋعا قاتىسۋىن ارتتىرۋ قازاقستانداعى گەندەرلىك تەڭدىك پەن تۇراقتى دامۋعا قول جەتكىزۋدىڭ نەگىزى بولىپ تابىلادى.

قاتىسۋشىلاردىڭ ايتۋىنشا سايلاۋ الدىنداعى كەزەڭدە سايلاۋعا قاتىساتىن ايەلدەرگە كاسىبي دايىندىق، بەلگىلى ءبىر داعدىلار مەن قۇزىرەتتىلىكتەردى مەڭگەرۋ، ساياسي جۇيەنىڭ تەحنيكالىق جانە فورمالدى اسپەكتىلەرىن زەردەلەۋ قاجەت.

وسىعان بايلانىستى قازاقستاننىڭ ايەلدەر كۇشتەرى اليانسى بۇكىل قازاقستان بويىنشا ساياساتكەر ايەلدەر كلۋبتارىنىڭ جۇمىسىن جانداندىرىپ، ايەلدەردىڭ ساياسي كوشباسشىلىعى مەكتەپتەرىن اشۋدا.

ايەلدەردىڭ ساياسي كوشباسشىلىعى مەكتەبى مەن ساياساتكەر ايەلدەر كلۋبىنىڭ ماقساتى – قازاقستانداعى جەتەكشى ايەل ساياساتكەرلەردىڭ تاجىريبەسىنە سۇيەنە وتىرىپ، ايەلدەردى باسقارۋ جانە باسەكەگە ءتۇسۋ قابىلەتتىلىگىن ارتتىرۋ جانە ۇيرەتۋ ارقىلى ايەلدەردىڭ ساياسي كوشباسشىلىعىن دامىتۋعا ەلەۋلى ۇلەس قوسۋ بولىپ تابىلادى.

ايەلدەردىڭ ساياسي كوشباسشىلىق مەكتەبىنىڭ مىندەتتەرى:

1. ايەلدەردىڭ قوعامدىق-ساياسي، زاڭ شىعارۋ جۇمىستارىنا، سونداي-اق مەملەكەتتىك قۇرىلىمدار مەن اتقارۋشى بيلىك ورگاندارىنا ۇسىنۋ ءۇشىن كادرلىق رەزەرۆىن قالىپتاستىرۋ؛
2. وقىتۋدىڭ ءتيىمدى باعدارلاماسىن قۇرۋ؛
3. جەتەكشى ايەل ساياساتكەرلەرمەن تالىمگەرلىك باعدارلاماسىنا قاتىسۋ.

ساياساتكەر ايەلدەر كلۋبىنىڭ مىندەتتەرى:

1. ايەلدەردىڭ مەملەكەتتىك جانە قوعامدىق-ساياسي جۇمىسقا ۇسىنۋ ءۇشىن كادرلىق رەزەرۆىن قالىپتاستىرۋ؛
2. ايەلدەردىڭ كوشباسشىلىق مەكتەپتەرىنىڭ جۇمىسىن ۇيىمداستىرۋ؛
3. ولكەنىڭ تاريحي تۇلعالارى اراسىنان باسشى ايەلدەردى تانىمال ەتۋ.