قازاقستاندا ينفلياسيانىڭ تومەندەۋىنە اسەر ەتەرلىكتەي ازىرگە ەشقانداي العىشارتتار جوق. سوندىقتان بولجام بويىنشا جىل سوڭىنا دەيىن ەلدە ينفلياسيا دەڭگەيى 20-21%-عا جەتۋى، ءتىپتى ودان اسۋى مۇمكىن. بۇل تۋرالى استانادا "ەكونوميكا تۋرالى سويلەسۋ: قازاقستان جاڭا بولمىس اياسىندا" تاقىرىبىندا وتكەن كەزدەسۋ بارىسىندا شارا ۇيىمداستىرۋشى Jusan Analytics زەرتتەۋ ورتالىعىنىڭ باسقارۋشى ديرەكتورى ءانۋار قۋاندىقوۆ مالىمدەدى.

ونىڭ ايتۋىنشا، وتاندىق ەكونوميكادا جاقىن ۋاقىتتا اناۋ ايتقانداي وزگەرىستەر بولمايدى. بولجام بويىنشا قازاقستاندا ەكونوميكالىق ءوسىم باسەڭدەۋىن جالعاستىرىپ، جىل سوڭىنا قاراي 2،5%-دى قۇراۋى مۇمكىن. ونىڭ ۇستىنە وتاندىق جالپى ىشكى ءونىمنىڭ (ءجىو) 60%-دان استامىن قۇرايتىن اۋىل شارۋاشىلىعى، بايلانىس، ونەركاسىپ، قۇرىلىس، ساۋدا، كولىك جانە قويمالاۋ سەكىلدى 6 ءىرى سالانىڭ تورتەۋىندە ءوسىم تومەندەپ جاتىر.

«ءبىز 80 ەلدىڭ ەكونوميكاسىنا تالداۋ جۇرگىزدىك. ولار الەمدىك ءجىو-نىڭ 80-90%-ىن قۇرايدى. سول 80 ەلدىڭ 60-ىندا ينفلياسيا ماقساتتى مەجەدەن 2 ەسە جوعارى بولسا، 28 ەلدە 4 ەسە جوعارى. ال ءبىزدىڭ ەلدە 3 ەسەگە ارتىق»، - دەدى ءا. قۋاندىقوۆ.

الەمدىك ەكونوميكانىڭ ءوسىمى دە باسەڭدەپ جاتىر. حالىقارالىق ۆاليۋتا قورى مەن باسقا دا حالىقارالىق ساراپشىلاردىڭ بولجامىنشا، بيىل ءوسىم وتكەن جىلعىدان تومەن بولماق.  

«ءقازىر الەمدىك ەكونوميكانىڭ ءوسىمى 3،2%-دى قۇرايدى. جىل باسىنداعى كورسەتكىش – 4،4%. بولجام بويىنشا الداعى جىلى ءوسىم 2،7%-عا دەيىن تومەندەيدى. ودان دا تومەن بولۋى مۇمكىن. ويتكەنى ءقازىر قىمباتشىلىققا، ىقتيمال داعدارىسقا قاتىستى الەمدە ورتاق مامىلە، ورتاق كەلىسىم جوقتىڭ قاسى» دەدى Jusan Analytics جەتەكشىسى.