بۇگىن ەكىباستۇز قالاسىندا ءماشھۇر ءجۇسىپ كوشەسىندەگى 17 كوپپاتەرلى ءۇيدى جىلىتۋ جۇيەلەرىنە قوسۋ جوسپارلانىپ وتىر.
30 قاراشادا تاڭعى ساعات 08.00-دە ەكىباستۇزداعى توتەنشە جاعدايدى جويۋ جونىندەگى جەدەل شتابتىڭ وتىرىسىندا قالانىڭ جىلۋ جەلىلەرىندەگى قازىرگى جاعداي مەن تەمپەراتۋرالىق رەجيمدى قالپىنا كەلتىرۋ بويىنشا قابىلدانىپ جاتقان شارالار تالقىلاندى.
"بۇگىن جىلۋ ماگيسترالىندەگى ەكى نەگىزگى جارىلعان جەردى قالپىنا كەلتىرۋ جانە ءماشھۇر ءجۇسىپ كوشەسىندەگى 17 كوپپاتەرلى ءۇيدى جىلىتۋ جۇيەلەرىنە قوسۋ جوسپارلانىپ وتىر"، - دەلىنگەن ۇكىمەت باسپا ءسوز قىزمەتى تاراتقان اقپاراتتا.
ساعات 9.00-دەن باستاپ قالانىڭ الەۋمەتتىك نىساندارى تەكسەرىلىپ جاتىر. ۇكىمەت مۇشەلەرى مەن جەدەل شتاب قاتىسۋشىلارى ەكىباستۇز قالالىق اۋرۋحاناسىندا، قابىلداۋ بولىمىندە، پەرزەنتحانادا بولدى. مەديسينالىق مەكەمەلەردەگى تەمپەراتۋرا 24°C قۇرايدى.
